काठमाडौं (हाम्रो खेलकुद) – नेपाली राष्ट्रिय क्रिकेट टिमका भेट्रान खेलाडी शक्ति प्रसाद गौचन र ब्याडमिन्टनकी शोभा गौचन सम्मानित भएका छन् । शक्ति र शोभाले आ–आफ्नो खेलको माध्यमबाट राष्ट्रको शिर उचो पारेको भन्दै थासाङ स्पोर्टस् क्लबले सोमबार सातौ खुल्ला रनिङ शिल्ड धनुषवाण प्रतियोगिताको उद्घाटनका अवसर पारेर खेलाडीलाई सम्मान गरेको हो । 

उनीहरुलाई युवा तथा खेलकुद मन्त्री जगत सुनार र थासाङ स्पोर्टस् क्लबका अध्यक्ष श्रीकृष्ण शेरचनले सम्मानित गरे ।

नेपालले ऐतिहासिक एक दिवसीय अन्तर्राष्ट्रिय मान्यता प्राप्त गर्दा क्रिकेटर शक्ति गौचन टिमका महत्वपूर्ण खेलाडी रहेका थिए । उनले नेदरल्यान्डविरुद्धको ऐतिहासिक डेब्यु खेलपछि अन्तर्राष्ट्रिय क्रिकेटबाट सन्यास लिने घोषणा गरिसकेका छन् । नेपालमा हुने कुनै एक अन्तर्राष्ट्रिय क्रिकेट प्रतियोगिता खेलेर अन्तर्राष्ट्रिय क्रिकेटबाट सन्यास लिनेछन् ।

शोभाले सन् २०१७ मा पाकिस्तान इन्टरनेसनल सिरिजमा ऐतिहासिक रजतपदक दिलाएकी थिईन् । भने नेपाल खेलकुद पत्रकार मञ्चले हरेक वर्ष आयोजना गर्ने पल्सर स्पोर्टस् अवार्डमा महिला विधामा विजयी हुन सफल भएकी थिइन् ।

सातौ संस्करणको खुल्ला रनिङ शिल्ड धनुषवाण प्रतियोगिता आजबाट शुरु हुदैछ । प्रतियोगिताको पहिलो दिन ब्यक्तिगतका खेलहरु संचालन भईरहेको छ । अन्तिम दिन भने टिम इभेन्टका खेलहरु संचालन भइरहेका छन् । भाद्र १ गते सम्म संचालन हुने प्रतियोगितामा ब्यक्तिगततर्फ ५० जना खेलाडीको सहभागिता रहेको छ । टिम स्पर्धामा १३ टिमको सहभागिता रहेको छ ।