लन्डन (एजेन्सी) – लेस्टर सिटीले मोनाकोबाट विंगर रचिद घेज्जाललाई अनुबन्ध गरेको छ । उनलाई सिटीले १० मिलियन पाउण्डमा अनुबन्ध गरेको हो । २६ बर्षीय रचिदलाई सिटीले चार बर्षका लागि क्लबमा भित्र्याएको हो ।

यसै सिजन सिटीले आफ्नो विंगर रियाद माहरेजलाई म्यानचेस्टर सिटीलाई बेचेको थियो । उनले लियोनमा आफ्नो व्यवसायिक फुटबल यात्रा शुरु गरेका हुन् । उनी २०१७–१८ को सिजनमा मोनाको पुगेका थिए । उनले मोनाकोमा पछिल्लो सिजन ३३ खेल खेलेका थिए । जसमा चार खेल च्याम्पियन्स लिगका खेले । उनले मोनाकोमा रहँदा २ गोल समेत गरे ।

यस सिजनमा लेस्टरको यो पाँचौ खेलाडी अनुबन्धन हो । यसअघि लेस्टरले गोलरक्षक डानी वार्ड, डिफेन्डरद्वय रिकार्डो पेरेइरा, जोनी इभान र मिडफिल्डर जेम्स माड्डिसनलाई अनुबन्ध गरेको थियो । ‘म यहाँ धेरै खुसी छु । मैले प्रशिक्षकलाई लियोनमा रहँदा प्रशिक्षकसँग काम गरिसकेको छु ।’ उनले भने, ‘यो राम्रो क्लब हो र यहाँ राम्रा खेलाडी पनि छन् । मलाई आशा छ की यो सिजन लेस्टरमा राम्रो बित्ने छ ।’

प्रशिक्षक क्लाउड पउलले घेज्जाललाई स्वागत गर्दै भने, ‘रिचद हाम्रो समूहका लागि प्रतिस्पर्धात्मक खेलाडी हुने छन् ।’