लन्डन (एजेन्सी) – लन्डन क्लब चेल्सीले आफ्नो पहिलो रोजाईका गोलरक्षक थिवाउट कोर्टुवा स्पेनिस क्लब रियाल म्याड्रिडमा अनुबन्ध भए आर्सनलका गोलरक्षक पिटर चेकलाई अनुबन्ध गर्ने तयारी गरेको छ ।

कोर्टुवा रियालमा सरुवा नजिक रहँदा चेल्सीले आफ्नो पूर्व गोलरक्षक पिटर चेकलाई क्लबमा अुनबन्ध गर्ने तयारी गरेको हो । स्पेनिस क्लब एट्लेटिको मड्रिडबाट लोनबाट कोर्टुवा चेल्सी फर्किएपछि चेक दोस्रो रोजाईमा सीमत भएका थिए  । त्यसपछि पछि उनी अर्काे लन्डन क्लब आर्सनलमा पुगेका थिए ।

यदि कोर्टुवा रियालमा पुगे चेल्सीले चेकलाई नै पहिलो प्राथमिकतामा राखेको छ । चेक सम्भव नभए चेल्सीले लेस्टर सिटीका कस्पर स्केमिचेल र ब्राजिल तथा इटालियन क्लब रोमाका गोलरक्षक एलिसन बेकरलाई अनुबन्ध गर्ने योजना बनाएको छ । तर, एलिसन लिभरपुलमा अनुबन्ध नजिक छ ।

रियालले रसिया विश्वकपका गोल्डेन ग्लोभ विजेता कोर्टुवालाई ३५ मिलियन पाउण्डमा चार वर्षको लागि अनुबन्ध गर्ने तयारी गरेको छ । कोर्टुवाले भने आफु चेल्सीमै खुशी रहेको बताएका छन् ।

‘विश्वकप दौरान नै मैले मेरो सरुवा सम्बन्धीका समाचारहरु आएको थियो । तर, अहिले र केही समयमा के हुन्छ, यसबारे मैले मेरो एजेन्टसँग निरन्तर सम्पर्क गरिरहेको छु ।’ कोर्टुवाले भने, ‘म यत्तिकै चेल्सी छाड्न चाहन्न ।’ चेल्सी र रियालबीच कोर्टुवा र इडेन हजार्डलाई सरुवा गर्ने सहमति भएको बुझिएको छ ।