काठमाडौं (हाम्रो खेलकुद)– पटक पटकको प्रयासपछि पनि एसियाली खेलकुदको तयारी प्रशिक्षणमा सामेल नभएपछि राष्ट्रिय खेलकुद परिषद् (राखेप) ले कराते खेलाडी नवीन रसाइली टोलीबाट हटाएको छ । नवीनको ठाँउमा छनोटको फाइनलमा ६७ केजीको फाइनलमा उनैसँग पराजित भएका विजय लामालाई समावेश गरिएको छ । डन्डोनेसियामा भदौ २ देखि १७ गते सम्म १८ औं एसियाली खेलकुद आयोजना हुँदैछ । 

जेठ १ गते देखि पोखरामा अभ्यास गरिरहेका कराते टोलीका अन्य खेलाडीसँग विजय असार १७ गतेबाट सामेल भएको प्रशिक्षक दीपक श्रेष्ठले जानकारी दिएका छन् । असार १५ मा सदस्य सचिव स्तरीय निर्णयका आधारमा विजय टोलीमा सामेल भएका हुन् । विजयले सन् २०१४ मा इन्चोन एसियाडमा पनि नेपालको प्रतिनिधित्व गरेका थिए ।

खेलाडी विजय लामा

राष्ट्रिय टिम तयारीका निर्देशक अर्जुनबहादुर विकले बारम्बार फोन सम्पर्क, पत्रचार र राष्ट्रिय दैनिकमा सुचना जारी गर्दा पनि नवीन सम्पर्कमा नआएपछि उनको ठाँउमा विजयलाई राखिएको बताए । नवीन बालाजु एकेडेमीका खेलाडी हुन् । वैशाखमा भएको एसियाली खेलकुदका लागि छनोट भएका सबै खेलाडी पोखरामा प्रशिक्षणमा रहँदा पनि नवीन भने सहभागी भएनन् ।

‘मैले नै पटक पटक नवीनसँग र उनका प्रशिक्षक ध्रुब विक्रम मल्लसँग प्रशिक्षणमा सामेल हुनका लागि भन्दै सम्पर्क गरे । पछि फोन उठ्न छाड्यो ,निर्देशक विकले भने, ‘पछि त्यसपछि पत्र पठाएम् । पत्र नबुझेपछि हुलाकमार्फत दुई पटक पत्र पठायौं । त्यसको पनि जवाफ आएन । असार १५ मा अन्नपूर्ण पोष्टमा सुचना जारी गर्यौं । त्यसपछि पनि सम्पर्कमा नआएपछि हामीले विजयलाई छनोट गरेका हौं ।’

उता खेलाडी नवीनले भने आफु विदेश र सल्याण प्रतियोगितामा भाग लिन गएका कारण प्रशिक्षणमा सामेल हुन नपाएको बताउँछन् । उनले एसियाडमा भाग लिने भन्दै छनोटमा भाग लिएको बताएपनि प्रशिक्षणमा रहेका अन्य खेलाडीसँगै किन नगएको भन्ने प्रश्नमा जवाफ दिएनन् । उनले आफुले कुनै जानकारी नदिएको स्वीकार गरे । निर्देशक विकले एक पटक प्रशिक्षणमा सामेल हुन फोन गरेको उनको भनाई थियो ।

नवीनका प्रशिक्षक मल्लले भने आफ्नै खेलाडीले एसियाड खेल्ने दाबी गरे । ‘मैले मन्त्री, सदस्य सचिवलाई पनि जानकारी गराइसकेको छु,’ उनले भने, ‘नवीन यो बीच प्रतियोगितामा भाग लिन गएका थिए । अब पनि जान्छन् । त्यसैले उनी समावेश नभएको हुन् ।’ एक पटक विकसँग फोनमा आफ्नो कुरा भएको स्वीकार गर्दै मल्लले हुलाकबाट आएको पत्र आफुले केहि दिन अघि मात्र प्राप्त गरेको बताए ।

उनले नवीनको ठाँउमा अर्को खेलाडीलाई प्रशिक्षणमा सामेल गर्नु बेइमानी भएको बताए । मल्लका अनुसार नवीन र उनी प्रतियोगिता खेल्न आइतबार जोर्डन जाने तयारीमा छन् । जुलाई १७ मा नेपाल फर्केपछि नवीन जुलाई १८ मा थाइल्यान्ड जाने तयारीमा रहेको पनि मल्लले जानकारी दिए । यसअघि एन्चोड एसियाडमा जस्तै यसपटक पनि खेलाडीका कारण विवाद बढ्ने सम्भावना देखिएको छ ।