पोखरा (हाम्रो खेलकुद)– अखिल नेपाल फुटबल संघ (एन्फा) का उपाध्यक्ष कृष्ण थापाले पोखरा लेखनाथ महानगरपालिकामा रहेको सहारा एकेडेमीलाई आवश्यक सहयोग गर्ने बताएका छन् । पोखराको वडा नम्ब १७ स्थित दोबिल्लामा रहेको फुटबल एकेडेमी अबलोकनका क्रममा शुक्रबार थापाले यस्तो वचन दिएका हुन् ।

एकेडेमी सञ्चालक संस्था सहारा क्लबका सल्लाहकार समेत रहेका पूर्व खेलाडी थापाले भने ,’ सहारा एकेडेमी देशकै नमुना एकेडेमी भएको छ, यसलाई दिगो रुपमा संचालन गर्न जसरी विभिन्न क्षेत्रबाट सहयोग आएको छ, यसमा हामी एन्फाले पनि केहि सहयोग गर्नेछ ।’

राष्ट्रिय फुटबल टोलीका पूर्व प्रशिक्षक समेत रहेका थापाले आफ्नो तर्फबाट प्राविधिक ज्ञान सिप बाढ्न पनि तयार रहेको बताएका छन् । थापा एन्फाको गत महिना भएको निर्वाचनबाट उपाध्यक्षमा निर्वाचित भएका थिए ।सन् १९८४ मा काठमाडौंमा भएको पहिलो दक्षिण एसियाली खेलकुद (साग तत्कालिन साफ) मा फुटबलमा नेपालले स्वर्ण पदक जित्दा थापा टोलीका सदस्य थिए ।

सो अवसरमा एन्फा कास्की का अध्यक्ष मीलन गुरुङ ले सहारा एकेडेमी पोखरा को गौरव भएको बताए । उपाध्यक्ष थापालाई सहारा क्लबका अध्यक्ष केशव बहादुर थापा, निवर्तमान अध्यक्ष विरभद्र आचार्यले एकेडेमीमा स्वागत गरेका थिए । एकेडेमीमा हाल १६ जिल्लाका २८ जना बालक रहेको महा–सचिव विश्वराज बरालले बताए ।