काठमाडौं (हाम्रो खेलकुद) – सबैभन्दा चर्चित तथा अपेक्षित प्रतियोगिता फिफा विश्वकपको २१ औं संस्करण जुन १४ देखि रुसमा सुरु हुँदैछ । हाम्रो खेलकुद डटकमको यस ‘विश्वकपमा हेर्नलायक २० खेलाडी’ सुचीको नम्बर १९ मा रहेका छन् जर्मनीका स्टार खेलाडी थोमस मुलर ।

सन् २०१० विश्वकपका गोल्डेन बुट विजेता मुलर २०१४ विश्वकपका सिल्भर बुट विजेता हुन् । उनले दुवै विश्वकपमा ५-५ गोल गरेका थिए । २०१० को विश्वकपको उत्कृष्ट युवा खेलाडी पनि चुनिएका मुलर २०१४ को अल-स्टार ११ मा लियोनल मेस्सी र नेयमारसँगै अग्रपंक्तिमा परेका थिए ।

खेलमा आफ्नो फुर्तिका लागि चिनिने मुलर ३६ गोलसहित जर्मनीका लागि दशौं सर्वाधिक गोलकर्ता हुन् । त्यस्तै विश्वकपमा १० गोलसहित उनी प्रतियोगिताका आठौं सर्वाधिक गोलकर्ता हुन् ।

यस सिजन बायर्न म्युनिख र जर्मनीका लागि कुल ४८ खेलमा सहभागी हुँदै मुलरले १६ गोल र १६ असिस्ट गरे । यस सिजन बायर्न म्युनिखबाट लिग जितेका उनी लिगमा सर्वाधिक असिस्ट गर्ने खेलाडी पनि हुन सफल भए ।

यस विश्वकपमा उनको भूमिका गोल गर्ने र गोल सिर्जना गर्ने तिर उत्तिकै केन्द्रित हुने छ । उनी मुख्य स्ट्राइकर, सेन्ट्रल मिडफिल्ड वा दायाँ विङमा खेल्न सक्छन् । उनको यस बहुआयामिक भूमिकाले जर्मन टोलीलाई छुट्टै स्वतन्त्रता र लचकता दिएको पनि छ । उनी मिडफिल्ड वा विङमा खेले आरबि लेपजेगका टिमो वेर्नरले अग्रपंक्तिको भूमिका सम्हाल्न सक्ने छन् ।

विश्वकपमा मुलरको प्रदर्शन सधै प्रभावशाली रहेकोले उनी जर्मनी टिम र प्रशिक्षक जोकिम लोका भरपर्दो पात्र हुन् । यस वर्ष साविक विजेता जर्मनीले आफ्नो उपाधि रक्षा गर्ने हो भने मुलरको भुमिका पुन: निकै महत्त्वपूर्ण हुने छ ।

हेर्नुहोस् जर्मनीको प्रारम्भिक विश्वकप टोली ।

विश्वकपमा हेर्नलायक २० खेलाडी – नम्बर २०