मस्को (एजेन्सी) – विश्व फुटबलको महाकुम्भ फिफा विश्वकप २०१८ सुरु हुन अब २१ दिनमात्र बाँकी छ । च्याम्पियन्स लिगमा खेल्ने खेलाडी बाहेक अन्य सबै क्लबका खेलाडीहरु राष्ट्रिय टोलीको प्रशिक्षणमा सम्मिलित भइसकेका छन् ।

पाउलो डिबाला र डेविड सिल्भा दुवै यसपटक आ-आफ्नो राष्ट्रका लागि महत्त्वपूर्ण भूमिका निर्वाह गर्ने क्षमता बोकेका खेलाडी हुन् । म्यानचेस्टर सिटीलाई प्रिमियर लिग उपाधि दिलाउन सिल्भाले उत्कृष्ट प्रदर्शन गरेका थिए । डिबालाले पनि युभेन्ट्सलाई लिग जिताउँडा प्रभावशाली प्रदर्शन गरेका थिए । दुवै खेलाडीले राष्ट्रिय टोलीमा प्रभाव पार्ने अपेक्षा गरिएको छ ।

रसियामा हुने विश्वकपमा ३२ राष्ट्र सम्मिलित छन् । प्रतियोगिताको प्रत्यक समूहमा चार टोली छन् र समूह चरणका खेलपश्चात शीर्ष २ टोली राउन्ड अफ १६ मा प्रवेश गर्नेछन् । प्रतियोगितामा सहभागी ३२ मध्ये २० टोलीले यसअघिको संस्करणमा पनि सहभागिता जनाएका थिए । यसपटक विश्वकपमा दुई टोलीले पहिलोपटक सहभागिता जनाउँदै छन् । आइसल्याण्ड र पानामाको यो पहिलो विश्वकप यात्रा हो ।

प्रतियोगितामा खेल संचालन गराउन फिफाले ३६ रेफ्री र ६३ सहायक रेफ्रीको सुची पनि सार्वजनिक गरिसकेको छ । यसपटक विश्वकपमा भिडियो असिस्टेन्ट रेफ्री (भार) को पनि प्रयोग हुनेछ । भारको लागि विशेष रेफ्रीका रुपमा १३ भार रेफ्रीलाई पनि नियुक्त गरिएको छ ।

१४ जुनबाट सुरु हुने प्रतियोगितामा कुल  ६४ खेल खेलिनेछ । प्रतियोगिताका खेल संचालन गर्न ११ सहरका १२ रंगशाला प्रयोग गरिनेछ । प्रतियोगिताको फाइनल खेल जुलाई १५ तारिखमा मस्कोको लुझिन्की रंगशालामा हुनेछ । विश्वकप विजेताले सन् २०२१ मा हुने फिफा कन्फेडेरेसन कपमा सहभागिता जनाउनेछ ।

प्रतियोगिताको आधिकारिक बल एडिडासले उत्पादन गर्नेछ । यसपटक एडिडासले सन् १९७० को विश्वकपलाई आधार मानेर तेल्स्टार १८ नामक बल प्रयोग गर्नेछ । यसबाहेक विश्वकपको मास्कोटको रुपमा जाबिभाका पनि सार्वजनिक गरिएको छ ।