अल्ट्रा धाविका मिरा राई सोमबार सम्मानित भएकी छन् । नेपाल क्यानाडा फ्रेन्डसिप कल्चर एसोसिएसनले गरेको कार्यक्रममा मिरालाई सम्मान गरेको हो ।

उपप्रधान तथा गरिबि निवारण मन्त्री चित्रबहादुर केसीले उनलाई नगद सहितको सम्मान गरेका थिए । अल्ट्रा दौडमार्फत नेपाललाई अन्तर्राष्ट्यि क्षेत्रमा चिनाउन सफल मिरा अल्ट्राको महिला धाविकका तर्फ विश्वको दोस्रो वरियता खेलाडी हुन् । खुसी हुँदै सम्मानपछि मिराले भनिन्, भोजपुरको विकट गाउँबाट आएर, सरकारको सहयोग विना शुभचिन्तक सहयोगीहरुको साथमा अहिले सम्मको यात्रा तय गर्न सफल भएको बताइन् ।

उनले भनिन् , म विश्वका ८ देशको पहाडमा दौडिएर फर्केकी छु । हाम्रो त जताततै पहाड छ। यस्तोमा झन अल्ट्राको बढी सम्भावना हुन्छ । तर हाम्रो सरकारले यसलाई ध्यान दिएको छैन । उनले खेल जीवनमा अझै अघि बढ्ने अठोट व्यक्त गर्दै अहिले सम्म सहयोग गर्ने सबैलाई धन्यवाद दिइन् । सो अवसरमा उनले कराते प्रशिक्षक ध्रुबविक्रम मल्ललाई पनि धन्यवाद दिइन् । मल्लकै सल्लाह, सुझाव र सहयोगमा मिरा अल्ट्रामा प्रवेश गरेकी थिइन् । उनी माओवादी सेना समायोजनमा अयोग्य ठहरिएपछि अल्ट्रातर्फ अघि बढेकी हुन् ।

गत असारमा फ्रान्समा सम्पन्न ८० किलोमिटर दुरीको म्याराथन डु मोन्ट ब्लान्स अल्ट्रा दौडको उपाधि जितेपछि मिरा चर्चामा आएकी थिइन् । उनले त्यो दौड १२ घन्टा ३१ मिनेट १२ सेकेन्डमा पुरा गरेकी थिइन् ।