काठमाडौं (हाम्रो खेलकुद) – नेपाल ओलम्पिक कमिटि र राष्ट्रिय खेलकुद परिषद (राखेप) बीच आसन्न एसियन गेम्सबारे कसरी अघि बढ्ने भन्ने विषयमा छलफल भएको छ ।

सातदोबाटोस्थित नेपाल ओलम्पिक कमिटिको परिसरमा शुक्रबार भएको छलफलमा इन्डोनेसियामा हुने आसन्न एसियन गेम्समा नेपाली टिमको समयमै तयारी र प्रशिक्षणबारे छलफल भएको नेपाल ओलम्पिक कमिटिका महासचिव लामा टेण्डी शेर्पाले हाम्रो खेलकुदलाई जानकारी दिए ।

‘नेपाल ओलम्पिक कमिटिले यसअघि मित्रराष्ट्र कतार, रसियाको ओलम्पिक कमिटिहरुसँग खेलाडीलाई प्रशिक्षणको व्यवस्था मिलाइदिने विषयमा सम्झौता भएको थियो । आज त्यसै विषयमा छलफल भएको हो ।’ महासचिव शेर्पाले भने, ‘यस विषयमा सरकार र राखेपसँग सहकार्य गरेर अघि बढ्ने र अन्य मित्र राष्ट्र जापान र कोरियाको ओलम्पिक कमिटिसँग पनि प्रशिक्षणको लागि सम्झौता गर्न पहल गर्ने विषयमा पनि छलफल भएको छ ।’

यस्तै महासचिव शेर्पाले एसियन गेम्स आउन पाँच महिना पनि बाँकी नरहेको अवस्थामा खेलहरु र खेलाडीको सङ्ख्या टुङ्गो लगाएर तत्काल प्रक्रिया अघि बढाउने विषयमा छलफल भएको बताए ।

महासचिव शेर्पाले सातदोबाटोमा रहेको ओलम्पिक कमिटिको भवन हाम्रै सम्पति रहेको बताए । ‘कानुनी राज्यमा हामीले कानुन मान्नुपर्छ । कानुन नमान्नुको विकल्प छैन ।’ शेर्पाले भने ।