आठौँ राष्ट्रिय खेलकुदको लोगो सार्वजनिक

नेपालगञ्ज (हाम्रो खेलकुद) – आगामी वर्षको मंसिरमा नेपालगन्जमा हुने आठौं राष्ट्रिय खेलकुद प्रतियोगिताको लोगो, गीत, नारा र म्यास्कट (हात्तीको बच्चाको छावा) मंगलबार सार्वजनिक गरिएको छ ।

लोगो, गीत, नारा र म्यास्कट राष्ट्रिय खेलकुद परिषद्का सदस्य सचिव केशवकुमार विष्टले एक समारोहका बीच सार्वजनिक गरे । उक्त राष्ट्रिय खेलकुदको परिचयात्मक सामाग्री वरिष्ठ मूर्तिकार दीपक गौतम संगीतकार वसन्त सापकोटा र आठौँ राष्ट्रिय खेलकुद प्रतियोगिता सचिवालयका सचिव इन्द्र कार्की सम्मिलित कार्यदलले बनाएको थियो ।

आठौँ खेलकुदको नारा ‘आठौँ खेलकुद हाम्रो प्रदेशमा, पसिना र पौरख आफ्नै देशमा’ रहेको छ । सो अवसरमा बोल्दै सदस्यसचिव विष्टले खेलकुदबाटै नेपाललाई विश्वमा चिनाउन सकिने बताए । नेपालगञ्ज उपमहानगरपालिकाका उपप्रमुख उमा थापामगरले राष्ट्रिय खेलकुदलाई उपमहानगरपालिकाले सफल बनाउन उत्कृष्ट प्रयास गर्ने बताइन् ।

राष्ट्रिय खेलकुद परिषद्का सदस्य एवं आठौँ खेलकुदका संयोजक विनोद मैनालीले निर्धारित समयमै प्रतियोगिता सम्पन्न गर्नका लागि अहिलेदेखि नै तयारी थालिएको जानकारी दिए ।