धनगढी (हाम्रो खेलकुद) – नेपाल आइस सुदूरपश्चिम खप्तड गोल्ड कपमा आयोजक सुदूरपश्चिम ११ एपिएफसँग २-० ले पराजित भयो । सुदूरपश्चिमका प्रशिक्षक ललित चन्दले पहिलो गोलले सुदूरपश्चिमका खेलाडीलाई नर्भस बनाएको जनाएका छन् ।

५७ औं मिनेटमा मैदानको दाँया तर्फ सुदूरपश्चिमका खेलाडीले बल आउट भएको मान्दै छोडेको बललाई एपिएफका खेलाडीले क्रस गरे । त्यहि क्रसलाई सदुपयोग गरेका अन्जनले कुल फिनिस गर्दै एपिएफलाई अग्रता दिलाएपछि आक्रोशित दर्शकहरुले मैदानमा पानीको बोतल प्रहार गरेपछि खेल केहीबेर रोकियो ।

‘खेलमा दुवै टोलीले गोलको अवसर सिर्जना गरेको थियो । एपीएफले गोल गर्न सफल हुदा हामीले मौकाको सदुपयोग गर्न सकेनौ यो नै हारेको कारण हो ’ प्रशिक्षक चन्दले भने, ‘रेफ्रीले पनि ठुला टिमलाई बढी फेभर गरेर खेलाउदा खेलले अर्कै मोड लिन पुग्यो । पहिलो विवादास्पद गोलपछि खेलाडी नर्भस भएर खेले । तर, रेफ्रीको निर्णयलाई हामील मान्नुपर्छ ।’ उनले रेफ्रीले हामीले पाएको पेनाल्टी नदिदा पनि खेलले अर्कै मोड लिएको पनि बताए ।

सुदूरपश्चिमका प्रशिक्षक चन्द

जितपछि एपीएफका प्रशिक्षक रत्नकाजी महर्जनले घरेलु टिमसँग दवाबमा खेल्नु परेको र विस्तारै खेलमा लय समातेको बताए । उनले सेमिफाइनलमा फिनिसिङमा अझै केही समस्या रहेको र यसलाई सुधार गरेर उपाधि जित्ने लक्ष्य हेको बताए ।

‘हामीलाई फाइनलका लागि २४ घण्टाको आराम पनि छैन । यो प्रतियोगिता व्यवस्थापनको कमजोरी हो । तर, टाइसिट त्यही अनुसारको रहेकाले खेल्नैपर्ने बाध्यता छ,’ प्रशिक्षक महर्जनले खेलपछि भने, ‘हामी फिजिकल्ली भन्दा पनि मानसिक रुपमा तयार भएर खेल्नेछौं । आर्मीसँग सताक्षी गोल्डकपको हारेका थियौं , त्यसको बदला लिने लक्ष्यमा हुनेछौं ।’