लाहोर (हाम्रो खेलकुद) – पाँचौं एकदिवसीय नेत्रहीन विश्वकप क्रिकेटको आइतबार औपचारिक रुपमा उद्घाटन भएको छ । गद्याफी स्टेडियमको अल हम्रा आर्टस् काउन्सिल एडिटरियममा एक भव्य समारोहका बीच पाँचौं संस्करणको एकदिवसीय नेत्रहीन विश्वकप क्रिकेटको सुभारम्भ भएको हो ।

उद्घाटन समारोहमा पाकिस्तानको संस्कृति परम्परा झल्कने किसिमको प्रस्तुति प्रदर्शन गरिएको थियो । विश्वकपको शुभारम्भ दुबई र पाकिस्तानमा एकसाथ भएको थियो । दुवै देशमा भएको मार्चमास प्रत्यक्ष प्रशारण गरिएको थियो ।

पाकिस्तानमा भएको विश्वकप उद्घाटनको मार्चपासमा नेपालका कप्तान कृतन श्रेष्ठ दुवालले नेपालको झन्डा बोकेका थिए । नेपाली टोलीले मार्च पास गर्दा पाकिस्तानमा रहेका नेपाली विद्यार्थी र समर्थकले भव्य स्वागत गरेका थिए । बंगलादेशका कप्तान तान्जिलुर रहमान र पाकिस्तानका कप्तान निसार अलिले आफ्नो देशको झन्डालाई बोकेका थिए ।

सो अवसरमा स्थानीय अशक्त बालबालिकाले विभिन्न किसिमका प्रस्तुति प्रस्तुत गरे । यस संस्करणको विश्वकप क्रिकेटको पहिलो खेल भने सोमबार आयोजक पाकिस्तान र बंगलादेशले लाहोरको गद्याफी स्टेडियममा तथा दुबईको अजमान ओभल क्रिकेट ग्राउन्डमा भारत र अष्ट्रेलिया बीच खेलिनेछ ।

नेपालले भने आफ्नो पहिलो खेल ९ जनवरीमा आयोजक राष्ट्र पाकिस्तानसँग जिन्नाह स्टेडियम गुज्रानवालामा खेल्ने भएको छ । दोस्रो खेल १० जनवरीमा नेपालले बंगलादेशसँग इकबाल स्टेडियमा खेल्नेछ । ११ जनवरीमा भने नेपाल दुबई प्रस्थान गर्नेछ ।

१३ जनवरीमा दुबईको अजमान ओभल क्रिकेट ग्राउन्डमा तेस्रो खेल श्रीलंकासँग खेल्नेछ । १४ जनवरीमा नेपालले अजमानकै इडन गार्डेनमा डिफेन्डिङ च्याम्पियन भारतसँग खेल्नेछ । लिगको अन्तिम खेलमा नेपालले १५ जनवरीमा अजमानको एमसिसी क्रिकेट ग्राउन्डमा बलियो टोली अस्ट्रेलियाविरुद्ध आफ्नो चुनौती प्रस्तुत गर्नेछ ।

फाइनल हुने स्थान यसअघि पाकिस्तान तोकिएपनि परिमार्जन भएको हो । भारत बाहेकको एसिया राष्ट्र विश्वकपको फाइनलमा पुगेमा फाइनल खेल पाकिस्तानमा हुनेछ । तर, अस्ट्रेलिया अथवा भारत पुगेमा फाइनल खेल दुबईमा हुनेछ । फाइनल खेल १८ जनवरीमा दुबई अथवा पाकिस्तानको लाहोरमा हुनेछ ।