काठमाडौं (हाम्रो खेलकुद) – तेस्रो संस्करणको दक्षिण एसियाली रोल बल च्याम्पियनसिप अर्काे साता राजधानीमा हुने भएको छ । आयोजक नेपाल रोल बल संघले आइतबार राजधानीमा पत्रकार सम्मेलन गर्दै प्रतियोगिता यही पुस १४ र १५ गते हुने जानकारी गराएको हो ।

प्रतियोगिता त्रिपुरेश्वरस्थित राष्ट्रिय खेलकुद परिषद (राखेप) को कबर्डहलमा हुनेछ । प्रतियोगितामा आयोजक नेपालसहित दक्षिण एसियाका भारत, बंगलादेश, पाकिस्तान र श्रीलंकाको सहभागिता पक्का भइसकेको तर भुटान र माल्दिभ्सको भने टुंगो लाग्न बाँकी रहेको संघका अध्यक्ष वीर कृष्ण महर्जनले जानकारी गराए ।

च्याम्पियनसिपमा सार्क राष्ट्रका १८२ खेलाडी र ३० अफिसियल गरी २१२ जनाको उपस्थिति रहने छ । विश्व रोल बल च्याम्पियनसिपमा नेपालले पुरुषतर्फ ४ र महिलातर्फ ३ पटक सहभागिता जनाइसकेको छ । सन् २०१७ मा बंगलादेशमा सम्पन्न चौथो विश्व रोल बल च्याम्पिनसिपमा नेपाल पुरुषतर्फ पाँचौं र महिलातर्फ सातौं स्थान ओगट्न सफल भएको थियो ।

रोल बल च्याम्पियनसिपमा नेपालका लागि पुरुषतर्फ कप्तान मनोज बज्रचार्य हुने छन् । त्यस्तै, अन्य खेलाडीमा सजिव महर्जन, आसय बिसी, अभिषेक मानन्धर, नियोन न्यौपाने, मनिष रेग्मी, विरेन्द्र खतिवडा, सतिश श्रेष्ठ, विशाल सापकोटा, अजय मगर, हुमांसङ गुरूङ र मुनाल भारती रहेका छन् ।

त्यस्तै, महिलातर्फ कप्तान मनिशा थापा, रोश्मा श्रेष्ठ, पासाङ शेर्पा, सुनिता तामाङ, हिशी लामा, दिपुसा केसी, लिजा श्रेष्ठ, आस्था सिंह, मेरिना रेग्मी, अश्मिन लेखक, सुमन्ता खड्का र अक्षता श्रेष्ठ रहेका छन् । प्रतियोगिताको अनुमानित लागत करिब ४२ लाख रहेको संघले जनाएको छ ।