काठमाडौं (हाम्रो खेलकुद) – नेपाल मोटर स्पोर्टस क्लबको आयोजना तथा नेपाल अटो मोबाइल एसोसिएसनको सहकार्यमा नेपालमा पहिलोपटक राष्ट्रिय स्तरको भक्सवागन राष्ट्रिय अटो जिमखाना च्याम्पियनसिप हुने भएको छ ।

आयोजकले राजधानीमा आइतबार पत्रकार सम्मेलनको आयोजना गरि पहिलो संस्करणको भक्सवागन राष्ट्रिय अटो जिमखाना च्याम्पियन सिप यही पुस १५ गते हुने जानकारी गराएको हो । च्याम्पियनसिप काभ्रेको धुलिखेलस्थित हिमालयन मोटर ल्याण्ड रेसिङ सर्किटमा हुनेछ ।

नेपाल अटोमोबाइल एसोसिएसन अन्तर्गतको मोटर स्पोट्र्स क्लबले पहिलोपटक नेपालमा राष्ट्रिय स्तरको जिमखाना च्याम्पियनसिप गर्न लागेको हो । क्लबले यसअघि रेसमान्डू, रेस नारीलगायतको बाइक रेसिङ प्रतियोगिता गर्दै आएको क्लबका सीताराम न्यौपानेले जानकारी गराए ।

कार रेसको रुपमा रहेको च्याम्पियनसिपमा ६४ जना खेलाडीले प्रतिस्पर्धा गर्नेछन् । पहिलो चरणमा उच्च अंक जोड्ने १६ खेलाडीले दोस्रो चरणमा स्थान बनाउने छन् । त्यस्तै, दोस्रो चरणमा उत्कृष्ट प्रदर्शन गर्ने ८ खेलाडी फाइनल चरणको लागि छनोट हुने क्लबका अध्यक्ष दीपक कुमार आचार्यले जानकारी दिए ।

सहभागी खेलाडीले डिभाइडर र कोनको सहायताले निर्माण गरिएको ७ सय मिटर लामो रेसिङ कोर्समा आयोजकले बनाएको ढाँचाअनुसार कार कुदाउनुपर्ने हुन्छ । स्पिड, स्किल र दिमाग लगाउनुपर्ने खेल रहेको यो च्याम्पियनसिपमा खेलाडीले एक पटक नक्सा हेरेर सम्झनाकै भरमा कार कुदाउनुपर्ने हुन्छ ।

बाटो बिर्सिएको खण्ड र डिभाइडर छोएको खण्डमा खेलाडीलाई जरिवाना हुनेछ र अंक गुमाउने छ । भक्सवागन गाडीको नेपालमा आधिकारिक बिक्रेता पूजा इन्टरनेसनलको प्रायोजनमा हुन लागेको प्रतियोगिताको बिजेता खेलाडीले अर्को वर्ष इन्डोनेसियामा हुने एसियन अटो जिमखाना च्याम्पियनसिपमा नेपालको प्रतिनिधित्व गर्नेछन् ।