काठमाडौं (हाम्रो खेलकुद) – नेपाल ओलम्पिक कमिटि (एनओसी) ले रियो ओलम्पिकमा सहभागिता जनाएका सात खेलाडीलाई नगदसहित सम्मानित गरेको छ ।

आइतबार राजधानीमा एक कार्यक्रमका बीच नेपाल ओलम्पिक कमिटिका अध्यक्ष जीवनराम श्रेष्ठले रियो ओलम्पिकमा सहभागिता जनाएका ५ खेलका ७ खेलाडीलाई जनही १ लाख ३ हजार ४ सय ५० रुपैयाले सम्मानित गरेको हो ।

जुडोकी फुपूल्हामु खत्री, पौडीकी गौरिका सिंह, तेक्वान्दोकी निशा रावल, एथलेटिक्सकी सरस्वती भट्टराई, एथलेटिक्सका हरि कुमार रिमाल, आर्चरीका जित बहादुर मोक्तान र पौडीका शिरिष गुरुङ नगदसहित सम्मानित भएका हुन् । पौडीकी गौरिका सिंह भने कार्यक्रममा उपस्थित भएकी थिइनन्। उनी परिवारसँग लण्डनमा रहेकी छिन् ।

सन् २०१६ मा ब्राजिलको रियोमा भएको ओलम्पिकमा फुपूले ६३ केजी तौल समूह मुनि प्रतिस्पर्धा गरेकी थिईन् । ओलम्पिकमा पुरा बाउट खेल्ने फुपु पहिलो खेलाडी हुन् । पौडीकी गौरिका सिंह रियो ओलम्पिकमा सबैभन्दा कान्छी खेलाडी बनेर चर्चित भएकी थिईन् । उनी आफ्नो हिट चरणका पहिलो स्थानमा आएकी थिईन् । एथलेटिक्सकी सरस्वती भट्टराईले १५ सय मिटर दौडमा २१ वर्ष पूरानो कीर्तिमान भंग गरेकी थिईन् । यस्तै पौडीका शिरिष गुरुङले १०० मिटर फ्रि स्टाइलमा कीर्तमान बनाएका थिए ।

सम्मान कार्यक्रमपछि अध्यक्ष जीवनराम श्रेष्ठले ओलम्पिकको छात्रवृत्ति पाएको तर, ओलम्पिकमा सहभागिता जनाउन नसकेकालाई पनि उपलब्ध गराइसकेको बताए । अध्यक्ष श्रेष्ठले आसन्न टोकियो ओलम्पिकको छात्रवृत्तिका लागि पनि पहल गर्ने पनि बताए । जापानमा सन् २०२० मा हुने टोकियो ओलम्पिकका लागि वैदेशिक प्रशिक्षणको लागि पनि पहल गरिने बताए ।