काठमाडौं (हाम्रो खेलकुद) – विश्व कप नजिकिदै गर्दा समर्थकमाँझ उत्साह बढ्दो छ । फुटबलको महाभिडन्त आरम्भ हुन अब मात्र ६ महिना मात्र बाँकी छ । समर्थक आ– आफ्ना स्टार खेलाडी राष्ट्रका लागि खेलेको हेर्न आतुर छन् । तर निश्चय पनि धेरै फुटबल प्रेमीले केहि खेलाडीलाई भने ‘मिस‘ गर्नेछन् । उनीहरुको अभावमा यसपटकको रुस विश्वकप केहि खल्लो हुन सक्ने छ ।     

आर्टुरो भिडाल

चिलीले विश्व कप छनोट अन्तर्गत अन्तिम तथा निकै महत्वपूर्ण खेलमा ब्राजिलसँग भिड्दै गर्दा बायर्न म्युनिखका मिडफिल्डर भिडाल प्रतिबन्धित थिए । अघिल्लो दुई विश्व कपमा भिडालले आकर्षक प्रदर्शन गरेका थिए । चिली यसपटक छनोट नहुँदा ३० वर्षीय भिडाललाई उनका समर्थकले रुस विश्वकपमा देख्न पाउँने छैनन् ।

एलेक्सिस स्यान्चेज 

हाल आर्सनलका भरपर्दा एट्याकर एलेक्सिस स्यान्चेज पनि चिलीले विश्व कपमा स्थान नबनाउँदा यसपटक ‘मिस‘ हुनेछन्। बार्सिलोनाबाट लन्डन पुगेका स्यान्चेज त्यसयता राम्रो फर्ममा छन् र आर्सनलको अग्रपङ्क्ति सम्हाल्दै आएका छन् । म्यानचेस्टर सिटी र अन्य युरोपका ठूला क्लबको नजरमा रहेका स्यान्चेजलाई यसपटक भने चिलीको विङ्गबाट विश्वकपमा खेलेको देख्न पाइने छैन ।

ग्यारेथ बेल 

इन्जुरीको समस्याबाट ग्रसित ग्यारेथ बेलको वेल्सले युरो २०१६ मा राम्रो प्रदर्शन गरेपनि विश्व कप छनोटमा प्लेअफ सम्म पनि स्थान बनाउँन सकेन । आयरल्यान्डसँग २ अंकले पछि पर्दै छनोट हुने सम्भावना गुमाएको वेल्सबाट आरोन रामसे , जो एलेन जस्ता खेलाडी पनि देखा पर्ने छैनन । टोटेनह्यामबाट कीर्तिमानी १ सय मिलियन युरोमा रियल म्याड्रिड पुगेका बेललाई रियलका समर्थक साथै उनका अन्य शुभचिन्तकले पनि ‘मिस‘ गर्नेछन् ।

आर्जेन रबेन 

तीन पटक विश्व कपका महत्वपूर्ण खेलाडी आर्जेन रबेनको नेदरल्यान्ड्सको खराब यात्रा जारि रह्यो र डचले रुस विश्व कपमा स्थान बनाउन सकेन । स्विडेनसँग छनोट चरणमा २ गोल गर्दै रबेनले होल्याण्डबाट अन्तिम खेल खेले । अब रुस विश्व कपमा मात्र हैन उनलाई विश्व कपमा देख्न पाउने सम्भावना सामाप्त भएको छ । रबेनको स्पिड र मेहेनत नेदरल्यान्ड्सले अवश्य ‘मिस‘ गर्नेछ ।

जियानलुइगी बुफोन 

विश्व कप पछि ग्लोभ्स बिसाउने निर्णय सार्वजनिक गरेका इटालीका गोलकिपरको अन्तिम विश्व कपमा सहभागी रहने सपना अधुरै रह्यो । ३९ वर्षीय बुफोनले स्विडेनसँग प्ले अफमा भोगेको पराजयपछि सन्यासको घोषणा गरे । इटालीबाट पाँच पटक (११९८ , २००२ , २००६ , २०१० , २०१४) विश्व कपमा सहभागी भएका बुफोनलाई यसपटक भने देख्न पाइने  छैन ।

एजेन्सीको सहयोगमा