काठमाडौं (हाम्रो खेलकुद)– अब राजधानीमै साहसिक खेल प्याराग्लाइडिङको व्यावसायिक उडान सुरु भएको छ । काठमाडौंको जहरसिंह पौवामा शंखरापुर प्याराग्लाइडिङ प्रालिले काठमाडौंमा बिहीबार पत्रकार सम्मेलन गरी व्यावसायिक रुपमा उडान सुरु गरेको जानकारी दिएको हो ।

जहरसिंह पौवाबाट विभिन्न हिमाली शृंखलाका साथै काठमाडौं र भक्तपुर सहर तथा मेलम्चीको समेत दृष्यावलोकन गर्न मिल्ने गरी साहसिक खेल प्याराग्लाइडिङको व्यावसायिक उडान सुरु भएको शंखरापुर प्याराग्लाइडिङ प्रालिका प्रवन्ध निर्देशक कुशल थापाले बताए । २०७० सालमा संस्कृति, पर्यटन तथा नागरिक उड्डयन मन्त्रालय र नागरिक उड्यन प्राधिकरण तथा स्थानीय प्रशासनको अनुमतिमा सोलो तथा २०७१ बाट व्यावसायिक टेन्डम उडान सुरु गरेको प्रालिले जानकारी दिएको हो ।

४ वर्षसम्म खेलकुदका उडान गरी परीक्षण गरेको र अहिले पूर्ण रुपमा व्यवसायिक उडान शुरु भएको प्रालिका प्रबन्ध निर्देशक थापाले जानकारी गराए । समुन्द्र सतहबाट १ हजार ९ सय ५ मिटरको उचाइमा रहेको जरसिंह पौवाबाट टेकअफ गरेपछि करिब ३० मिनेटको उडानपछि शंखरापुरमा नगरपालिकाको पटापमा ल्याण्ड हुनेछ ।

अहिले शंखरापुर प्याराग्लाइडिङ प्रालि नेपालमा १२ जना सोलो र ४ जना व्यावसायिक टेन्डम पाइलट रहेको प्रालिका प्रबन्ध निर्देशक थापाले बताए । विदेशीका लागि एक जनाको १ सय अमेरिकी डलर र नेपालीका लागि ५ हजार ५ सय रुपैयाँ शुल्क राखिएको बताइएको छ ।