काठमाडौं (हाम्रो खेलकुद)– अन्तर्राष्ट्रिय रिङ रेस्लिङ च्याम्पियनसिपको दोस्रो संस्करण आज हुँदैछ । प्रतियोगिता त्रिपुरेश्वरस्थित राष्ट्रिय खेलकुद परिषद (राखेप)को कभर्ड हलमा शनिबार हुदैछ । दोस्रो खेल इटहरीको ठुलो जनता माविमा कात्र्तिक २७ गते सोमबार हुदैछ ।

प्रतियोगितामा नेपाल सहित ८ देशका रेस्लरहरुको सहभागिता रहने संघकी अध्यक्ष सुनिता थापाले हिजो आयोजित पत्रकार सम्मेलनमा जानकारी दिइन् । आयोजक नेपालसहित अमेरिका, सिंगापुर, अष्ट्रेलिया, मलेसिया, रसिया, चेक रिपब्लिक र भारत गरी आठ राष्ट्रका रेस्लरहरुले प्रतिस्पर्धा गर्दैछन् । प्रतियोगितामा नेपालका आठ रेस्लरहरुले प्रतिस्पर्धा गर्ने संघकी अध्यक्ष सुनिता थापाले बताइन् । विदेशबाट ७ पुरुष र २ महिलाको सहभागिता रहनेछ ।

उनीहरुले सात इभेन्ट ह्याण्डीकयाप, ट्याग टिम, रोयल ब्याटल, हार्ड कोर, जोडी म्याच, सिंगल्स र त्रिपल थ्रेट म्याच मा प्रतिस्पर्धा गर्नेछन् । प्रतियोगितामा अमेरिकाका प्रोःरेस्लिङ गेमर, सिंगापुरका दी युरासियन ड्रागन, अष्ट्रेलियाका वामबाम बेलोज, मलेसियाका द बुचरम्यान तथा भारतका दिलदार सिंह, निल र माक्सम्यानले विदेशी खेलाडीका रुपमा प्रतिस्पर्धा गर्नेछन् । नेपालका तर्फबाट नुवाकोटे टाइगर, द युभ, डेभिड, थाकु, ब्लेड, साइन र टुप्पी ग्याङ रेस्लरहरुले प्रतिस्पर्धा गर्नेछन् ।

प्रतियोगिता खेल्न अन्तर्राष्ट्रिय महिला रेस्लरहरु पनि आउने पक्का भएको संघकी अध्यक्ष थापाले बताइन् । रसियाकी मेफिस्तो र चेक रिपब्लिककी रोमानाले अन्तर्राष्ट्रिय महिला खेलाडीका रुपमा तथा नेपालका सोफी र दिलासाले प्रतियोगितामा सहभागिता जनाउनेछन् । प्रतियोगिता सञ्चालनमा झन्डै झन्डै ५५ लाख रुपैयाँ खर्च संघको अनुमान छ । रेस्लिङको डिस होम एक्सन स्पोर्टसबाट प्रत्यक्ष प्रसारण हुनेछ ।