काठमाडौं (हाम्रो खेलकुद) – दोस्रो अन्तर्राष्ट्रिय रिङ रेस्लिङ च्याम्पियनसिप कात्तिक अन्तिम साता हुने भएको छ । नेपाल रिङ रेस्लिङ संघको आयोजना तथा डिस होमको मुख्य प्रायोजनमा च्याम्पियनसिप कात्तिक २५ गते राखेप कभर्ड हलमा तथा कात्तिक २७ गते इटहरीको ठूलो जनता माविमा हुने बिहीबार पत्रकार सम्मेलनमा जानकारी दिइयो ।

प्रतियोगितामा नेपाल सहित ८ देशका रेस्लरहरुको सहभागिता रहने संघकी अध्यक्ष सुनिता थापाले जानकारी गराइन् । प्रतियोगितामा अमेरिका, सिंगापुर, अष्ट्रेलिया, मलेसिया र भारत सहित नेपालका आठ रेस्लरहरुले प्रतिस्पर्धा गर्ने बताइएको छ ।

उनीहरुले सात इभेन्ट ९फ्ल्याग, सिंगलस, ह्याण्डीक्याप, रोयल रम्बल, ट्याग टिम महिला/पुरुष र हाड कोर०मा प्रतिस्पर्धा गर्नेछन् । प्रतियोगितामा अमेरिकाका प्रोरेस्लिङगेमर, सिंगापुरका दी युरासियन ड्रागन, अष्ट्रेलियाका वामबामबेलोज, मलेसियाका द बुचरम्यान तथा भारतका दिलदार सिंह, निल र माक्सम्यानले विदेशी खेलाडीका रुपमा प्रतिस्पर्धा गर्नेछन् ।

नेपालका तर्फबाट नुवाकोटे टाइगर, द युभ, डेभिड, थाकु, ब्लेड, साइन र टुप्पी ग्याङ रेस्लरहरुले सहभागिता जनाउने छन् । प्रतियोगिता खेल्न अन्तर्राष्ट्रिय महिला रेस्लरहरु पनि आउने पक्का भएको संघकी अध्यक्ष थापाले बताइन् । रसियाकी मेफिस्तो र चेक रिपब्लिककी रोमानाले अन्तराष्ट्रिय महिला खेलाडीका रुपमा तथा नेपालका सोफी र दिलासाले प्रतियोगितामा सहभागिता जनाउनेछन् । प्रतियोगिता सञ्चालनमा झन्डै झन्डै ५५ लाख रुपैयाँ खर्च संघको अनुमान छ ।