लण्डन (एजेन्सी) – मोनाकोबाट लोनमा पेरिस सेन्ट जर्मन (पिएसजी)मा रहेका किलियन बाप्पेले गए राति गोल्डेन बोय २०१७ को उपाधि हात पारेका थिए ।

वर्षको उत्कृष्ट युवा खेलाडिलाई दिइने यस अवार्डमा बाप्पेले बार्सिलोनाका उस्माने डेम्बेले र म्यानचेस्टर युनाइटेडका मार्कोस रासफोर्डलाई उछिनेका थिए ।

गत सिजन उनले मोनाकोका लागि ४४ खेलमा २६ गोल गरेका थिए । उनको प्रदर्शनको मद्दतले मोनाकोले १७ वर्षमा पहिलो पटक लिगको उपाधि जित्यो भने टोलीले च्याम्पियन्स लिगमा सेमिफाइनल सम्मको यात्रा तय गरेको थियो । यस सिजन पनि बाप्पेले पिएसजीका लागि निकै राम्रो प्रदर्शन गरिरहेका छन् ।

यस अवार्ड हात पार्ने क्रममा बाप्पेले २९१ मत पाएका थिए । दोस्रोमा रहेका डेम्बेलेले भने १४९ मत जितेका थिए । त्यस्तै रासफोर्ड ७६ मतसहित तेस्रो भए भने म्यानचेस्टर सिटीका फरवार्ड गाब्रियल जेससले ७२ मत पाउँदै चौथो भए ।

२१ वर्षभन्दा कम उमेरको उत्कृष्ट खेलाडिलाई दिइने यस अवार्ड यो भन्दा अघि वेन रुनी (२००४), लियोनल मेस्सी (२००५), मारियो बालोटेल्ली (२०१०) र पल पोग्बा (२०१३) ले जितिसकेका छन् ।

गत वर्षको विजेता रेनाटो सान्चेज भने बायर्न म्युनिखमा अवसर नपाई अहिले इङ्ग्लिस क्लब स्वान्सिमा लोनमा रहेका छन् ।