म्यानचेस्टर (एजेन्सी) – इङ्लिस टोली म्यानचेस्टर सिटीले च्याम्पियन्स लिग समूह एफमा शाख्तार डोनेस्कलाई २–० ले हराउँदै आफ्नो दोस्रो जित दर्ता गरेको छ । सिटीका लागि केभिन डि ब्रुयन र रहिम स्टेर्लिङले गोल गरेका थिए ।

खेलको ४८ औँ मिनेटमा डेभिड सिल्भासँग पास साटासाट गर्दै डि ब्रुयनले पेनाल्टी बक्स बाहिरबाट शानदार गोल गर्दै सिटीको गोलको खाता खोलेका थिए । त्यसैगरी खेलको अन्तिम मिनेटतिर बर्नार्डो सिल्भाको पासको सदुपयोग गर्दै रहिम स्टेर्लिङले सिटीको जित सुनिश्चित गरेका थिए ।

त्यस्तै सिटीका सर्वाधिक गोलकर्ता बन्न दुई गोल टाढा रहेका सर्जियो अगुएरोको पेनाल्टी शाख्तारका गोलकिपर आन्द्रे प्याटोभले बचाउ गरेका थिए । अगुएरोको अन्य दुई राम्रा प्रहार पनि प्याटोभले बचाऊ गरेका थिए ।

लिभरपुलले भने गएरातिको आफ्नो खेलमा स्पार्टाक मस्कोसँग १–१ को बराबरीमै चित्त बुझाउन पर्यो । लिभरपुलका लागि फिलिप कौटिन्होले गोल गरे भने घरेलु टोलीका लागि फर्नान्डोले फ्रिकिकमार्फत गोल गर्न सफल भएका थिए । समूह ईमा रहेको लिभरपुलले च्याम्पियन्स लिगका २ खेलमा दुवै बराबरी खेलेको छ ।

अर्को इङ्लिस टोली टोटनह्यामले भने एपोएल निकोसियामाथि ३–० को शानदार जित निकाल्न सफल भयो । टोटनह्यामका लागि उनका स्टार फरवार्ड ह्यारी केनले ह्याट्रिक गरेका थिए । समूह एचमा गए राति बोरुसिया डर्टमन्डलाई ३–१ ले हराएको रियल म्याड्रिड र टोटनह्याम दुई जितसहित ६ अंकमा छन् ।

च्याम्पियन्स लिगका अन्य खेलहरुको नतिजा

सेभिल्ला ३–० मेरिबोर

नेपोली ३–१ फेयेनूर्ड

बेसिक्टास २–० आरबि लेपजिग

मोनाको ०–३ पोर्टो