पेरिस (एजेन्सी)– पेरिस सेन्ट जर्मेन (पिएसजी) सिजनमा पहिलो पटक गए राती मोन्टपिलेर गोलरहित बराबरीमा रोकिएको थियो । जसमा चोटका कारण नेयमार खेलेनन् । तर पनि बेल्जियन थोमस म्युनियरले टोली नेयमारमा मात्र निर्भर नभएको बताएका छन् ।

नेयमार यहि सिजन कीर्तिमान २ सय २२ मिलियन युरोमा बार्सिलोनाबाट पिएसजी पुगेका थिए । संयोग नेयमार नखेलेकै खेलबाट पिएसजीको विजयी यात्रा रोकिएको छ । २५ वर्षे नेयमार पिएसजी पुगेयता निकै चर्चामा छन् । गत महिना टोलीबाट ‘डेब्यू’ गरेयता उनले लिग १ मा मात्र ४ गोल गरिसकेका छन् भने अरु गोलमा सहायक भूमिका निर्वाह गरेका छन् । उनले च्याम्पियन्स लिगमा समेत गोल गरिसकेका छन् ।

ती सबका वावजुद पनि म्युनियर नेयरमारकै भरमा मात्र टोली नरहेको बताउँछन् । प्रशिक्षक उनाइ इर्मीको टोलमिा इडिन्सन काभानी, केलियन बाप्पे जस्ता खेलाडी पनि रहेको म्युनियरले बताए । ‘हामीमा नेयमारको निर्भरता मात्रै छैन,’ म्युनियरले भने,‘हो उनी असाधारण खेलाडी हुन् । तर, जति बेला तपाई हाम्रो टोली हेर्नुहुन्छ , तपाई भन्न सक्नु हुन्न की नेयमार विना हामी जित्न सक्दैनौ ।’

उनले टोलीमा अन्य खेलाडी पनि त्यत्तिकै क्षमतावान रहेको सुनाए । ‘हामीसँग त्यस्ता खेलाडी छन्, जसले खेल परिवर्तन गर्ने क्षमता राख्छन्,’ म्युनियरले अगाडि थपे,‘हरेकलाई थाहा छ कठिन अवस्थाबाट कसरी टोलीलाई बाहिर ल्याउनुपर्छ । हो हामीलाई आज केही कठिन भयो किनकी हामी मोन्टपिलेर जस्तो टोलीसँग खेलिरहेका थियौ । त्यो शतप्रतिशत दिने टोली हो । ’

खुट्टाको सामान्य चोटका कारण अघिल्लो खेल गुमाएका नेयमार अर्को खेलमा फर्कने अपेक्षा गरिएको छ । पिएसजीले बुधबार च्याम्पियन्स लिगको समूह चरणमा बायर्न म्युनिखसँग अवे खेल खेल्ने छ ।