काठमाडौं (हाम्रो खेलकुद)– अनिल गुरुङ अहिले राष्ट्रिय फुटबल टोलीमा छैनन् । यद्दपी उनले एएफसी एसियन कप छनोटमा ताजकिस्तानसँग आज हुने खेल निकै महत्वपूर्ण रहेको जनाउँदै टोलीलाई जितका लागि शुभकामना दिएका छन् ।

‘एसियन कपमा हामी अघि बढ्नका लागि आज जित्नै पर्ने हुन्छ । यसमा प्वइन्ट लुज गर्यौं भने लगभग बाहिरिने खतरा हुन्छ ’ पोखरामा रहेका कप्तान अनिलले हाम्रो खेलकुद डटकमसँग भने, ‘त्यसैले आज जित्दै पर्दछ । हामीलाई घरेलु मैदानको एडभान्टेज पनि छ । केटाहरु फर्ममा पनि छन् । जित सम्भव छ । टोलीलाई जितका लागि धेरै धेरै शुभकामना छ ।’

नेपालले छनोटका अघिल्ला दुई खेलमा मात्र १ अंक जोडेको छ । आजको खेलमा अंक गुमाउँदा समूह चरणबाटै बाहिरिने खतरा छ । पहिलो खेलमा फिलिपिन्ससँग ४–१ को हार बेहोरेको नेपालले जेठमा यमनसँग गोलरहित बराबरी खेल्दै पहिलो अंक जोडको थियो ।

व्यक्तिगत चाहना ताजकिस्तानसँगको खेलमा पुरा गर्न नसकेकोमा अनिललाई दुःख त लागेको छ तर उनी टोलीको सफलताका लागि लिएर बढी खुसी देखिन्छन् । राष्ट्रिय टोलीबाट ४९ खेल खेलिसकेका अनिलले आजको खेलबाट ५० क्यापको कोसेढुंगा पुरा गर्ने अपेक्षा गरेका थिए । तर, उनी यसपटक अन्तिम छनोटमा पर्न सकेनन् ।

‘मैले पहिल्यै यो खेललाई अन्तिम मानेर तयारी गरेको थिए ’ उनले भने, ‘मेरो आफ्नै कारण यो पटक पुरा हुन सकेन । तर केही छैन म आफ्नो उद्देश्यमा दृढ छु । केही समय कुर्नुपर्ला । तर ५० क्याप पुरा गर्ने मेरो लक्ष्य अझै उस्तै छ । ’

ताजकिस्तानविरुद्धको खेलका लागि अनिलकै कप्तानीमा नेपाली टोलीले जापान भ्रमण गरेको थियो । तर, स्वदेश फर्केको केही दिनमा उनको कुर्कुच्चामा चोट लाग्यो । अहिले पनि उनीको कुर्कुचा पूर्ण रुपमा ठिक भएको छैन । उनले सोचे, खेल्न नसक्ने भएपछि प्रशिक्षक र व्यवस्थापकलाई जानकारी दिनुपर्दछ ।

‘मैले प्रशिक्षक र व्यवस्थापकलाई मेरो समस्या बताए । उहाँहरुले पनि खेल्न सक्दैनौ भने ठिकै छ,’ अनिलले भने ‘जापनाबाट फर्केपछि एक साता जति अभ्यास गरे । फिटमा पनि थिए । प्रशिक्षक पनि मेरो प्रदर्शनबाट खुसी हुनुहुन्थ्यो । दुर्भाग्य केही दिनअघि पर्खालबाट ओर्लने क्रममा दुवै कुर्कुच्चामा दुखाई भयो । अनि मैले राम्ररी अभ्यास पनि गर्न सकिन । अहिले पनि दुःखाई छ । अब यसको उपचार गर्नुछ ।’

यति बेला अनिल शोकमा छन् । शनिबार राती उनको हजुरआमा (आमाको आमा) को निधन भएको थियो । हजुर आमाको स्वास्थ्य थप खराब भएपछि उनी शनिबार बिहान पोखरा पुगेका थिए ।