काठमाडौं (हाम्रो खेलकुद) – लायन्स सेन्टिनियल ओपन हेरिटेज साइकल राइड अर्काे साता हुने भएको छ । लायन्स क्लब इन्टरनेसनल ३२५ ए वान अन्र्तगतका विभिन्न ५२ वटा क्लबहरुको आयोजनामा लायन्स सेन्टिनियल ओपन हेरिटेज साइकल यात्राको आयोजना गरिएको कार्यक्रम संयोजक किशोर भट्टराईले जानकारी गराए ।

‘हाम्रो सम्पदा हाम्रो पहिचान’ भन्ने मुल नाराका साथ भदौं २० गते मंगलबार हुने साइकल यात्रामा करिव १५ सय साइकल यात्रीले सहभागिता जनाउने आयोजकले बताएको छ । जसका लागि विभिन्न साइक्लिङ ग्रुपसँग सहकार्य भैरहेको आयोजकले जनाएको छ ।

यस्ता खालका कार्यक्रमले भूकम्पले क्षति पु¥याएको हाम्रो समाजको पौराणिक तथा धार्मिक संस्था एवम् पुरातात्विक मठ मन्दिरको जगेर्ना गर्न तथा पूर्ननिर्माण प्रक्रियामा लैजान र यसको संरक्षण गर्न सहयोग पुग्ने अपेक्षा गरिएको छ ।

३० किलोमिटरको साइकल यात्रा भृकुटीमण्डपबाट शुरु भएर बसन्तपुर, स्वयम्भु, शोभा भगवती, दरबार मार्ग, भाटभटेनी, कालोपुल, चावाहिल, बौद्ध, गौरीघाट, पशुपतिनाथ, गौशला, पुरानो बानेश्वर, नयाँ बानेश्वर, शंखमुल, मंगलबजार, पुल्चोक, कुपन्डोल, थापाथली, माइतीघर, सिंहदरवार हुदै भृकुटीमण्डपमा टुंगिनेछ ।

प्रतियोगितालाई एनआइसी एसिया बैंकले मुख्य प्रायोजन गरेको छ । यस्तै स्पोन्सर इनर्जी ड्रिङ्स, टर्किस एयर लाइन्सले प्रायोजन गरेको छ । कार्यक्रम समापन गर्न करिव ६ लाख ४० हजार खर्च हुने अनुमान आयोजकले गरेको छ ।