काठमाडौं (हाम्रो खेलकुद)– मुख्यतः नेपालको भलिबल प्रबद्र्धनको उद्देश्यसहित स्थापित संजय स्मृती प्रतिष्ठानले रौतहटको दुर्गम गाउँ लौकाहामा बाढी पिडितलाई राहत साम्रगी वितरण गरेको छ । स्थानीय प्रशासनको सहयोगमा प्रतिष्ठानले हालै करिब ३० भन्दा बढी घरपरिवारलाई राहत साम्रगी वितरण गरेको थियो ।

बाढी पीडितलाई राहत वितरण गर्दै सञ्जय स्मृति प्रतिष्ठानकी अध्यक्ष निरोज मास्के (बायाँ) ।

बाढीका कारण तराईमा हजारौ जनताले जनधनको क्षती ब्यहोरिरहेको बेला प्रतिष्ठानले राहत वितरण गरेको हो । लौकाहामा सरकार पछि राहत वितरण गर्ने प्रतिष्ठान पहिलो संस्था हो । संजय स्मृती प्रतिष्ठान अध्यक्ष निरोज मास्के, प्रतिष्ठानका रबिन्द्र पाल्पाली, रिता कोइरालाले राहत वितरण गरेका थिए ।

संजय स्मृती प्रतिष्ठान अध्यक्ष मास्केले तराई जनतालाई अप्ठयारो अवस्थामा सहयोग गर्न पाउँदा खुसी लागेको बताइन् । ‘अप्ठयारो अवस्थामा सहयोग गर्नु मानवीय धर्म हो । तराईका जनताले अहिले ज्यादै अप्ठयारो अवस्थाको सामना भोगिरहेको छन्,’ उनले भनिन्,‘यस्तो बेला सबैले आफनो ठाउँबाट सहयोग गरे तराई बासीलाइ धेरै राहत पुग्नेछ ।’

जिल्ला विकास रौतहटका इन्जिनियर दिपेन्द्र यादवले प्रतिष्ठानले सहयोगले लौकाहाबासीलाई राहत मिलेको बताए । प्रतिष्ठानले यसअघि बालबालिका, अशक्तलाई सहयोग गर्दै आएको छ । बाढी गएको लामो समय बितिसक्दा समेत सरकारी राहत पाउन नसकेका पिडितलाई प्रतिष्ठानले स्थानीय प्रहरीको सहयोगमा प्रभावित क्षेत्रमै पुगेर चामल, दाल, तेल, ब्लाङ्केट, चाउचाउ, म्याट्रेस, झुल, औषधी लगायतका सामाग्री वितरण गरेको थियो ।

प्रतिष्ठानले हरेक वर्ष नेपाली भलिबलमा योगदान गरेको एक पुरुष र एक महिला खेलाडीलाई सञ्जय स्मृती खेलकुद अवार्डबाट नगदसहित सम्मान गर्दै आएको छ ।