काठमाडौँ (हाम्रो खेलकुद ) – नेपाली करातेका सफल खेलाडी दक्षिण एसियाली खेलकुद (साग) का दुई स्वर्ण विजेता दीपक श्रेष्ठ कराते कोचेज तथा म्यानेजमेन्ट सेमिनारमा सहभागी हुन बिहीबार क्यानाडाको ओटावा प्रस्थान गरेका छन् ।

सेमिनार अगष्ट १८ देखि २२ तारिखसम्म सञ्चालन हुनेछ । क्यानाडाको सेमिनारपछि नेप्लिज स्पोर्ट्स एन्ड कल्चरल डेभलोप्मेन्ट कमिटीले आयोजना गर्ने अन्तरक्रियामा सहभागी हुन श्रेष्ठ अमेरिकाको न्युयोर्क जाने छन् । अन्तरक्रियामा नेपाली खेलकुदको विकासका विषयमा छलफल हुने बताइएको छ ।

त्यस्तै नेपालका लागि दक्षिण एसियाली खेलकुद (साग) मा लगातार ४ स्वर्ण र एसियाली खेलकुदमा २ कास्य पदक जितेका तेक्वान्दोका दीपक बिष्ट इन्टरनेसनल नेप्लिज तेक्वान्दो एसोसिएसन (आइएनटिए) को निमन्त्रणामा शुक्रबार अमेरिका जाँदैछन् । अगस्ट १४ मा पोर्टल्यान्टमा हुने आइएनटिएको बैठकमा बिष्ट सहभागी हुनेछन् ।

ओलम्पियन विधान लामा अध्यक्ष रहेको आइएनटिएमा एसियन खेलकुदकी रजत पदक विजेता सविता राजभण्डारी, किशोर श्रेष्ठ, नारायण गुरुङ, रेणुका थापा मगर, निर्मल श्रेष्ठ, निरञ्जन श्रेष्ठ, कमल क्षेत्री लगायत छन् । नेपालमा एभरेष्ट तेक्वान्दो गर्न सबैभन्दा मुख्य भूमिका आइएनटिएले नै गरेको थियो । त्यसपछि बिष्ट पनि श्रेष्ठसँगै न्युयोर्कको कार्यक्रममा सहभागी हुनेछन् ।

राष्ट्रिय खेलकुद परिषद् (राखेप) का सदस्य–सचिव केशवकुमार बिष्टले दुवैलाई सातदोबाटोस्थित अन्तर्राष्ट्रिय खेलकुद परिसरमा बिदाइ गरे ।