म्याड्रिड (एजेन्सी)– मोनाकोबाट केलियन बाप्पेलाई भित्राउने रियल म्याड्रिडको योजनामा सुपर स्टार क्रिस्टियानो रोनाल्डो खासै खुसी नभएको बताइएको छ । आफ्नो विकल्प खोज्ने पहिलो पाइलाको रुपमा बाप्पेको आगमन हुन सक्नेमा रोनाल्डोको शंका रहेको अनुमान गरिएको छ ।

स्पेनको डेरियो गोलका अनुसार रोनाल्डोले क्लबका अध्यक्ष फ्लोरेन्टिनो पेरजलाई पनि बाप्पे आउने विषय आफुलाई चित्त नबुझेको बताएका छन् । यद्दपी क्लब बाप्पेका लागि १ सय ८० मिलियन युरो खर्च गर्न तयार रहेको बताइएको छ ।

डेरियो गोलले बालोन डि’ओर उपाधिका लागि बाप्पलेले जियालुजी बुफोनसँग प्रतिस्पर्धा गर्ने अनुमान गरेको थियो । रोनाल्डो भन्दा अघि रहेको अनुमान गरिएको गोलकिपर बुफोन उपाधिका लागि हकदार मानिएको थियो । बुफोनले क्लबका लागि सम्भव सबै गरिसकेकोले उनी मुख्य दाबेदार रहेको जनाएको थियो । यससँगै बाप्पेले पनि ब्यालोन डि’ओरमा दावेदारी दिएको खण्डमा रोनाल्डोलाई थप दबाब पर्ने बुझिएको छ।

सम्झौता अनुसार रोनाल्डो सन् २०२१ को जुन सम्म रियलमा रहनेछन् । त्यति बेला उनी ३६ बर्ष हुन चार महिना बाँकी रहनेछ । अहिले सम्म क्लबका लागि ३ सय ९४ खेलमा रोनाल्डोले ४ सय ६ गोल गरिसकेका छन् । अहिले पनि उनी शारीरिक रुपमा निकै शसक्त रहेकोले आउने धेरै बर्षमा उनको उच्च स्तरमा प्रदर्शनमा गिरावट आउन सक्ने आंकलन गरिएको छ ।