काठमाडौं (हाम्रो खेलकुद) – दोस्रो संस्करणको धनलक्ष्मी महर्जन स्मृति राष्ट्रिय स्क्वास मंगलबारदेखि हुने भएको छ । आयोजक नेपाल स्क्वास संघले आइतबार पत्रकार सम्मेलनको आयोजना गर्दै दोस्रो संस्करण मंगलबार देखि शनिबारसम्म हुने जानकारी गराएको हो ।

यसपटक प्रतियोगितामा एक विधा थप गरिएको छ । मेन्स ओपन, गल्र्स ओपन, मास्टर ४५ देखि ५४ तथा भेट्रान ५५ वर्षमाथि, जुनियर ब्वाइज यु–१६ र जुनियर ब्वाइज यु–१९ गरी ६ विधामा खेल हुनेछ । यस्तै प्लेट च्याम्पियनसिप समेत हुनेछ । प्रतियोगिताको जुनियर ब्वाइज यु–१६ र जुनियर ब्वाइज यु–१८ विधालाई अगस्ट र सेप्टेम्बरमा भारतमा हुने इंण्डियन जुनियर च्याम्पियनसिप र इण्डियन क्लासिक च्याम्पियनसिपको तयारीको रुपमा हेरिएको छ । यस्तै यसै विधालाई सन् २०१८ मा हुने एसियाडको तयारीको रुपमा हेरिएको नेपाल स्क्वास राकेट्स संघका उपाध्यक्ष किरण श्रेष्ठले जानकारी गराए ।

प्रतियोगिताको ६ विधामा करिव ८५ भन्दा बढी खेलाडीले सहभागिता जनाउनेछ । करिव २ लाख ७५ हजार खर्च लागने अनुमान गरिएको प्रतियोगिताको मेन्स ओपनको विजेताले १८ हजार, दोस्रोले १० हजार र सेमिफाइनलमा पुग्नेले समान ४–४ हजार प्रँप्त गर्नेछन् । यस्तै गल्र्स ओपनको विजेताले ११ हजार, दोस्रोले ६ हजार र सेमिफाइनलमा पुग्नेले समान ३–३ हजार प्राप्त गर्नेछन् ।

यस्तै जुनियर ब्वाइज यु–१९ को विजेताले ६ हजार, दोस्रोले तीन हजार र सेमिफाइनलिष्टले समान १५–१५ सय तथा जुनियर ब्वाइज यु–१६ को विजेताले ४ हजार, दोस्रोले ३ हजार र सेमिफाइनलिष्टले समान १५–१५ सय प्राप्त गर्नेछन् ।