काठमाडौँ (हाम्रो खेलकुद) – टिम लुयनबर्गले टिम राइटलाई ४-१ ले हराउँदै पाँचौं अन्तर आर्सनल नेपाल फुटसलको उपाधि जितेको छ। सानेपा स्थित फिल्ड फुटसलमा शनिबार आयोजित प्रतियोगितामा १० टोलीको सहभागिता रहेको थियो।

१०० खेलाडिहरु सम्मिलित यस प्रतियोगितामा टोलीहरुलाई दुई समूहमा विभाजित गरिएको थियो । दुवै समूहबाट दुई-दुई टोलीहरुले सेमिफाइनलको यात्रा तय गरेका थिए । सेमिफाइनलमा टिम राइटले टिम सिम्यानलाई ५-४ ले हराउँदै फाइनल पुगेको थियो भने विजेता टिम लुयनबर्गले टिम एडम्सलाई २-० ले पन्छ्याउँदै उपाधि भिडन्त पक्का गरेको थियो ।

फाइनलमा कप्तान निरज पुडासैनीको ह्याट्रिकको मद्दतले टिम लुयनबर्गले ४-१ को सहज जित दर्ता गर्दै उपाधि उचालेको थियो । प्रतियोगिताका सर्वाधिक गोलकर्ता निरज पुडासैनी भए र सर्वोत्कृष्ट खेलाडिको उपाधि टिम राइटका कुबेर जङ्ग पाण्डेले प्राप्त गरे । लुयनबर्गका अमित खड्का उत्कृष्ट गोलकिपर चुनिए भने टिम सिम्यानका राजिव चौधरीले उदीयमान खेलाडीको उपाधि जिते । प्रतियोगिताको प्रायोजक जर्सी पसल र ज्याज अपस्टेर्स थिए।

प्रतियोगिताको समापन समारोहमा बोल्दै आर्सनल नेपालका अध्यक्ष नबिन चित्रकारले सहभागी सम्पूर्णलाई धन्यवाद दिए। ‘सबैको सहभागिताले नै यो प्रतियोगिता सफलतापूर्वक सम्पन्न भयो । आउने दिनमा पनि यस्तै साथको अपेक्षा राख्छौँ र सबैलाई धन्यवाद दिन चाहन्छौँ ।’

सन् २००९मा स्थापना भएको आर्सनल नेपालले वर्षभरी विभिन्न खेलकुद तथा सामाजिक गतिविधिहरु गर्दै आएको छ ।