काठमाडौं (हाम्रो खेलकुद)– नेपाल र संयुक्त अरब इमिरेट्स (यूएई) बीच शनिबार हुने एएफसी यू २३ च्याम्पियनसिप छनोटको खेलमा कुलिङ ब्रेक दिइने भएको छ । यूएईको अध्याधिक गर्मीका कारण कुलिङ ब्रेक दिन लागिएको नेपाली टोलीका व्यवस्थापक सञ्जिव मिश्रले जानकारी दिएका छन् ।

प्रशिक्षणका क्रममा खेलाडी एवं प्रशिक्षक

यूएईको तापक्रम ४१ डिग्रीभन्दा माथि रहेकोले च्याम्पियनसिपका सबै खेलमा कुलिङ ब्रेक दिइने बताइएको छ । कुलिङ ब्रेक एउटा खेलमा दुई पटक दिइनेछ । पहिलो ब्रेक ३० र दोस्रो ७५ मिनेटमा दिइने बताइएको छ । नेपाल र यूएईबीचको खेल दर्शकका लागि निशुल्क गरिएको छ ।

नेपाल र यूएईबीच शनिबार पहिलो पटक आधिकारिक प्रतिस्पर्धात्मक खेल हुने अखिल नेपाल फुटबल संघ (एन्फा) का सहायक महासचिव समेत रहेको मिश्रले बताए । नेपाल र यूएईबीचको खेल तुसुबिन मोहमद रंगशलामा हुनेछ । नेपालको राष्ट्रिय टोली र युएईको राष्ट्रिय टोलीबीच सन् १९९६ मा मैत्रीपूर्ण खेल भएको थियो ।

विमल घर्ती मगरको कप्तानीमा रहेको नेपाली टोलीले च्याम्प्यिनसिपको छनोटमा यूएईपछि सोमबार उज्वेकिस्तान र अन्तिम खेल लेबनानसँग बुधबार खेल्नेछ । नेपालले खेल्ने सुरुका दुई खेल नेपाली समय अनुसार राती ८ः१० बजे र अन्तिम खेल राती ११ बजे सुरु हुनेछ ।

बिहीबार युएई पुगेको नेपाली टोलले हिजै केही समय अभ्यास गरेको थियो । राजुकाजी शाक्य मुख्य प्रशिक्षक रहेको टोलीले यू २३ छनोट खेल्ने तयारीमा रहेको बंगलादेशको युवा टोलीलाई असार २७ गते सातदोबाटोस्थित एन्फा मैदानमा १–० ले हराएको थियो ।