काठमाडौं (हाम्रो खेलकुद) – शहिद दशरथ चन्द मेमोरियल ट्रष्टले विभिन्न आठ खेलका उत्कृष्ट खेलाडीलाई नगदसहित सम्मानित गरेका छन् । ट्रष्टले यसअघि पाँच विकास क्षेत्रबाट विभिन्न राष्ट्रिय तथा अन्तर्राष्ट्रिय खेलमा उत्कृष्ट प्रदर्शन गर्ने खेलाडी छनोट गरी पुरस्कृत गर्ने गरेकोमा यसपटकबाट तीन विधा थप गरि आठ विधामा पुरस्कृत गरेको हो ।

ट्रष्टले शहिद दशरथ चन्दको १ सय १५ औं जन्म जयन्तीको अवसर पारेर पाँच विकास क्षेत्रका पाँख खेलाडी, दुई पारा खेलाडी र एक खेलाडीलाई मरणोपरान्त जनही १० हजार १ रुपैयासहित शनिबार सम्मानित गरेको हो ।

सम्मानित हुनेमा पूर्वाञ्चलबाट फुटबलका नवयुग श्रेष्ठ, मध्यमाञ्चलबाट भलिबलकी प्रतिभा माली, पश्चिमाञ्चलबाट एथ्लेटिक्सकी विपना परियार, मध्यपश्चिमाञ्चलबाट क्रिकेटकी नेरी थापा र सुदुरपश्चिमाञ्चलबाट तेक्वान्दोकी निशा रावल सम्मानित भएका हुन् । यस्तै पारातर्फ पारा तेक्वान्दोकी सीता भण्डारी र एथ्लेटिक्स र क्रिकेटका विक्रमबहामदुर राना सम्मानित भए । चुनावमा सरिक हुन् गृहजिल्ला पुगेका नवयुग समारोह उपस्थित रहेका थिएनन्।

आरोहणका क्रममा दुईहप्ता अघि हिमाल आरोहणका क्रममा निधन भएका सञ्जय पण्डितलाई मरणोपरान्त पुरस्कृत गरिएको हो । पुरस्कृत खेलाडीहरुलाई पूर्वप्रधानमन्त्री लोकेन्द्र बहादुर चन्द, राखेपका सदस्य–सचिव केशव कुमार विष्ट र शहिद दशरथ चन्द मेमोरियल ट्रष्टका संस्थापक अध्यक्ष कर्णबहादुर चन्दले पुरस्कृत गरे ।

यस्तै ट्रष्टका अध्यक्ष कर्णबहादुर चन्दले सनराइज बैंकका प्रमुख कार्यकारी अधिकृत (सिइओ) रत्नराज बज्राचार्यले ट्रष्टको लागि वार्षिक ५० हजार सहयोग गरिएको जानकारी गराए ।