काठमाडौँ (हाम्रो खेलकुद) – असार महिनाको अन्तिम साताबाट सुरु हुने एएफसी यू २३ च्याम्पियनसिपका लागि नेपाली टोलीको कप्तानी राष्ट्रिय टोलीको फरवार्ड बिमल घर्ति मगरले सम्हाल्ने प्रबल सम्भावना रहेको छ। संयुक्त अरब इमिरेट्स (युएइ)मा आयोजना हुने यू २३ को छनोट चरणका लागि युवा टोलीले पछिल्लो सातादेखि सातदोबाटोस्थित एन्फा कम्प्लेक्समा प्रशिक्षणमा गर्दै आएको छ।

राजु काजी शाक्यको प्रशिक्षकत्वमा २८ सदस्यीय प्रारम्भिक टोलीले अब अर्को सातासम्म प्रशिक्षण गर्नेछ। छनोट चरणको तयारीका लागि एन्फाले असार २७ गते बंगलादेशको टोलीसँग मैत्रीपूर्ण खेल खेल्दैछ। प्रशिक्षक शाक्यले त्यस अघिनै लागि अन्तिम टोलीको छनोट गरिसक्ने बताएका छन्।

यद्दपी टोलीको कप्तानको टुङ्गो भने अझैसम्म लाग्न सकेको छैन। प्रशिक्षक शाक्यले भने अन्तर्राष्ट्रिय अनुभव र सिनियर भएको हिसाबले विमलले कप्तानी पाउने प्रबल सम्भावना रहेको बताएका छन्।

‘हाल टोलीमा रहेका खेलाडीमध्य बिमल सबैभन्दा अनुभवी खेलाडी हुन्। उनले सबैभन्दा पहिला राष्ट्रिय टोलीबाट डेब्यु गरेका थिए। उनले यसअघि पनि उमेर समूहको प्रतियोगिताहरुमा टोलीको नेतृत्व सम्हालिसकेका छन्। त्यसैले उनको सम्भावना बढी छ।’

विमल युवा टोलीका सबैभन्दा अनुभवी खेलाडी हुन् । दुइ बर्षअघि नेपालले उनकै कप्तानीमा घरेलु मैदानमा साफ यू १९ च्याम्पियनसिपको उपाधि जितेको थियो। त्यसअघि नेपालले एएफसी यू१६ च्याम्पियनसिपको अन्तिम चरणमा सहभागिता जनाउँदा पनि बिमलले टोलीको कप्तानी गरेका थिए।