काठमाडौं (हाम्रो खेलकुद) – एसियन बक्सिङ कन्फेडेरेसनको आयोजनामा हुने एएसबीसी एलाईट बक्सिङ च्याम्पियनसिपमा सहभागी हुन नेपाली राष्ट्रिय बक्सिङ टोली उज्वेकिस्तान प्रस्थान गर्ने भएको छ।

च्याम्पियनसिप आगामी अप्रिल ३० देखि मे ८ सम्म हुनेछ । दुई सदस्यीय नेपाली टिमको नेतृत्व नेपाल बक्सिङ संघका अध्यक्ष राम अवालेले गर्नेछन् । पुरन राईले ५६ केजी र दिपक श्रेष्ठले ६४ केजी तौल समूहमा नेपालको चुनौती पेश गर्नेछन् । टिम प्रशिक्षकमा बक्सिङका मुख्य प्रशिक्षक प्रकाश थापा मगर, संघको प्रतिनिधित्व गदै मानार्थ आजिवन अध्यक्ष विष्णु गोपाल श्रेष्ठ र ब्यवस्थापकमा संघका कोषाध्यक्ष गौतम सुजखु पनि उज्बेकिस्तानको तास्केन्ट प्रस्थान गर्नेछन् ।

उक्त च्याम्पियनसिप आगामी सेप्टेम्बरमा जर्मनीमा हुने एआइबीए वल्र्ड बक्सिङ च्याम्पियनसिप २०१७ को क्वालिफाइङ खेल समेत हो । यस प्रतियोगितामार्फत एक तौल समुहमा ६ खेलाडी छनोट हुनेछन् । दिपक भारतमा सम्पन्न १२औँ सागका कांस्य विजेता समेत हुन् । एक महिनाअघि थाईल्यान्डमा भएको अन्तर्राष्ट्रिय बक्सिङ च्याम्पियनसिपमा समेत दिपकले प्रतिस्पर्धा गरेका थिए । सो अवसरमा राखेप सदस्यसचिव विष्टले बक्सिङ खेल राष्ट्रले पनि पदकको सम्भावनाको हिसावले उच्च प्राथमिकता साथ अगाडी बढाइरहेकाले अवस्था खेलाडी र संघबाट पनि महत्वपुर्ण नतिजा आशा गरिरहेको बताए । सदस्य सचिव विष्टले पदक हासिल गर्न नसकेपनि प्रदर्शनको हिसावले सुधारन्मुख खेल प्रदर्शन गर्न सुझाव दिए ।

यस्तै सदस्य–सचिव बिष्टले बक्सिङको एकेडेमी निर्माणका लागि जग्गा उपलब्ध गराउने प्रतिबद्धता ब्यक्त गरे । नेपाल बक्सिङ संघका सदस्य ओमनारयण श्रेष्ठले एकेडेमी निर्माणका लागि ५ लाख रुपैया दिने घोषणा गरे । उनले खेलाडी प्रोत्साहनका लागि प्रत्येक बाउट बिजेतालाई २५ हजार र छनोट भएको खण्डमा ५० हजार नगद दिने घोषणा समेत गरे । त्यस्तै संघका मानार्थ आजिवन अध्यक्ष श्रेष्ठले खेलकुदमा ऐतिहासिक धरोहर बोकेको बक्सिङ खेल एकजुट भएर अगाडी बढ्नु पर्ने आवश्यकता औल्याए । बिदाई कार्यक्रममा खेलाडी प्रोत्साहनका लागि मानार्थ आजिवन अध्यक्ष विष्णुगोपाल श्रेष्ठ र अध्यक्ष अवालेले प्रतियोगिताका दौरान खेलाडीले एक बाउट जितेमा ५० हजार र छनोट भएको खण्डमा १ लाख दिने घोषणा गरे । त्यस्तै संघका पुर्व महासचिव दिपक गुरुङले खेलाडीले ३ राउण्ड मात्र पुरा गरेको खण्डमा २० हजार नगदले सम्मान गर्ने बताए ।

नेपाली राष्ट्रिय बक्सिङ टोलीलाई राष्ट्रिय खेलकुद परिषद (राखेप) का सदस्यसचिव केशव कुमार विष्ट, बक्सिङ संघका वरिष्ठ उपाध्यक्ष अर्जुन बहादुर केसी, राखेप तालिम तथा प्रशिक्षण विभाग प्रमुख नविन उप्रेती र सघंका पुर्व महासचिव दिपक गुरुङ लगायतले बिदाई गरे। टोली बिहिबार त्यसतर्फ प्रस्थान गर्दैछ।