काठमाडौं (हाम्रो खेलकुद) – ट्रेकिङ एजेन्सिस् एसोसिएसन अफ नेपाल (टान)को आयोजनामा हुने दोस्रो टान अन्तर्राष्ट्रिय लाङटाङ म्याराथनको तयारी पुरा भएको छ।

विानशकारी भूकम्प गएको दिन बैशाख १२ गते हुने म्याराथनको सबै तयारी पूरा भएको आयोजक टानले बिहिबार पत्रकार सम्मेलनमार्फत जानकारी गरायो। म्याराथन भूकम्प प्रभावित जिल्ला रसुवाको लाङटाङ क्षेत्रमा हुनेछ। टानले अघिल्लो वर्ष गोसाईकुण्डबाट सदरमुकाम धुन्चेसम्म हाफ म्याराथन आयोजना गरेको थियो।

प्रतियोगिता महिला र पुरुष दुई समुहमा सञ्चालन हुनेछ। दुवैतर्फका विजेताले १ लाख रुपैयासहित मेडल, प्रमाणपत्र पाउनेछन् । यस्तै दुवैतर्फका दोस्रो र तेस्रो हुनेले क्रमश ७५ हजार र ५० हजार प्राप्त गर्नेछ । म्याराथनमा करिब एक सय भन्दा बढि खेलाडीले सहभागिता जनाउने टानका मिडिय अफिसर सुर्यबहादुर घिमिरेले जानकारी गराए ।

३ हजार ८ सय ३० मिटर उचाईमा रहेको क्यान्जिङबाट सुरु हुने म्याराथन लाङटाङ, गाँउ–थाङस्याप–घाडा, तवेला–लामाहोटल–रिम्चे–शेर्पागाँउ–खान्जिम–ब्रिदिम र लिङलिङ हुदै स्याफ्रुबेशीमा आएर टुङ्गिनेछ । प्रतियोगितामा सहभागी हुन नेपाली धावकका लागि १७ सय र विदेशी धावकले ५५ सय शुल्क तोकिएको छ । हालसम्म ८० जना नेपाली खेलाडीको मात्र सहभागिताको आवेदन परेको टानले जनाएको छ ।