दिपक बोहोरा
इलाम – गोलकिपर किशोर गिरीले दुईवटा पेनाल्टी रोकेपछि रमपम झापा ११ ले टुबार्ग माई भ्याली गोल्ड कप फुटबल प्रतियोगिताको उपाधि जितेको छ । उनले यामाहाको १ सय ५० सिसीको मोटरसाइकल प्राप्त गरेका छन् ।

ठूलो टुडिखेलमा शनिबार भएको फाइनलमा त्रिभुवन आर्मी क्लबलाई टाइब्रेकरमा ४–२ ले हराउँदै झापाले उपाधि जितेको हो । सिजनमा झापाको यो दोस्रो उपाधि हो । यसअघि पुसमा झापाले मेची नेत्रालय काँकरभिट्टा गोल्ड कपको उपाधि जितेको थियो । झापाले गत बर्ष अर्को विभागिय टोली एपिएफलाई हराउँदै माईभ्याली गोल्ड कप लगातार दोस्रो जितेको थियो ।

निर्धारित ९० मिनेट र थप १५ मिनेट गोलरहित बराबरीमा टुंगिएपछि खेल टाइब्रेकरमा धकेलिएको थियो । फाइनलमा झापाका गोलकिपर किशोर नायक रहे । उनले आर्मीका जितेन्द्र कार्कीसहित दुई जनाको पेनाल्टी रोकेका थिए ।  सन्तोष फाइनलको म्यान अफ दी म्याच समेत बनेको थिए ।

प्रतियोगिताको व्यक्तिगत पुरस्कार फाइनल पुगेका दुई टोलीका समान ३ जनाले प्राप्त गरेका छन् । फाइनलको टाइब्रेकरमा २ गोल रोकेका झापाका गोलकिपर किशोर गिरी उत्कृष्ट गोलकिपर चुनिए । त्यस्तै सोही क्लबका दिलेन लोक्तान उत्कृष्ट रक्षक र सञ्जय राई उत्कृष्ट प्रशिक्षक चुनिए । आर्मीका सन्तोष तामाङ उत्कृष्ट मिडफिल्डर र टंक बस्नेत उत्कृष्ट फरवार्ड घोषित भए ।

माईभ्याली गोल्ड कपका पुरस्कार
विजेता – रमपम झापा ११ (४ लाख रुपैयाँ)
उपविजेता – त्रिभुवन आर्मी (२ लाख ५० हजार रुपैयाँ)
म्यान अफ दी सिरिज – विवेक बस्नेत (त्रिभुवन आर्मी)
उत्कृष्ट
गोलकिपर – किशोर गिरी (झापा ११)
रक्षक – दिलेन लोक्तान (झापा ११)
मिडफिल्ड – सन्तोष तामाङ (त्रिभुवन आर्मी )
फरवार्ड – टंक बस्नेत (त्रिभुवन आर्मी)
प्रशिक्षक – सञ्जय राई (झापा ११)
सर्वाधिक गोलकर्ता – अभिषेक रिजाल (नेपाल पुलिस)
उदयमान खेलाडी – अभिषेक लिम्बु (माईभ्याली फुटबल क्लब)