काठमाडौं (हाम्रो खेलकुद)– नेपाली युवा पुस्तामा अध्ययनका लागि विदेश जाने लहर नै छ । विदेश जानेमध्ये कमै मात्र स्वदेश फर्कन्छन् । त्यसमा फुटबल खेलाडी पनि अछुतो छैनन् । राष्ट्रिय टोलीबाट खेलिसकेका प्रलय राजभण्डारी र उमेर समूहबाट नेपालको गोलपोष्ट सम्हालेका राजीव श्रेष्ठ पनि अध्ययनका लागि अमेरिका पुगेको दशक पुरा भइसक्यो ।

बायाँबाट क्रमश – प्रलय, राजीव र गोपाल

समय मिलाएर छुट्टीमा आउने बाहेक उनीहरु नेपाल फर्कने नफर्कने निश्चित छैन । दुवैले अमेरिका अध्ययन र कामलाई सँगै अघि बढाइरहेका छन् । एन्फा एकेडेमीको पहिलो ब्याचका यी दुईको दोस्ती अहिले पनि उस्तै प्रगाढ नै छ । राजीव केही महिनाअघि र प्रलय गत महिनामात्र नेपाल आएर फर्केका थिए । प्रलय अमेरिकामा रहेका नेपाली खेलाडीको नेतृत्व गर्दै १५ औं आहा रारा गोल्डकप खेलेर फर्केका हुन् ।

नेपाल आउनुअघि नै अर्को एकजना साथी गोपाल सापकोटासँग मिलेर एउटा व्यवसाय सुरु गरिसकेका छन् । विदेशबाट फर्कने निश्चित नभएपनि आफ्नो ठाँउबाट जे गर्न सकिन्छ त्यो गरौं भन्ने उद्देश्यबाट उनीहरुले व्यवसाय थालेका हुन् । अमेरिका बसेपनि उनीको व्यवसाय भने नेपाल र नेपालीसँगै जोडिएको छ ।
उनीहरुले घुम्ती टेक कम्पनीमार्फत कनेक्ट टु नेपाल मोबाइल एप्लिकेसन तयार पारेका छन् । ‘नेपालमा प्रविधिको प्रयोगले नेपालीको जिवन सहज बनाउने लक्ष्य बोकेर ‘घुम्ती टेक’ को सुरुवात गरेको बताउँछन् ।

यो एप्लिकेसनबाट नेपालमा पोस्टपेड र प्रिपेड रिजार्च गर्न मिल्छ । यसको नयाँ अपडेडका रुपमा नयाँ अपडेटमा एनटिसी ल्यान्डलाइन , एडिएसएल , प्रिपेड र डिस होमको बिल पनि तिर्न सकिने कम्पनीका प्रमुख कार्यकारी अधिकृत समेत रहेका राजीव बताउँछन् । एपले स्वदेशको आफ्नो घरमा विदेशबाट बिल तिर्न सहज बनाएको छ । यसबाट ५ सेकेन्डमै रिचार्ज हुने बताइएको छ ।

एन्द्रोइड फोनमा गुगल प्ले र एप्पलमा एप स्टोर बाट सहजै सित्तैमा डाउनलोड गर्न मिल्ने एपमा नयाँ प्रयोगकर्ताले आफ्नो इमेलबाट खाता खोल्नु पर्ने हुन्छ । अहिलेलाई एपमा नेपालबाहिरबाट मात्र बिल तिर्न मिल्ने व्यवस्था छ । सञ्चालक प्रलय भविष्यमा नेपालबाटै पनि बिल बिल तिर्न मिल्ने व्यवस्था गरिने बताउँछन् ।

विदेशमा भिसा, मास्टरकार्ड जस्ता डेबिट तथा क्रेडिट कार्डबाट पैसा तिर्न मिल्ने यो एपमा पेपालबाट पनि बिलको पैसा तिर्न मिल्ने बताइएको छ । बिल तिरे पछी इमेलमा कारोबारको नोटिफिकेसन आउनका साथै नेपालमा रहनेको फोनमा समेत सुचित मेसेज प्राप्त हुनेछ ।

राजिव र गोपालले भर्जिनियामा अमेरिकी कलेज अफ कमर्स एन्ड टेक्नोलोजिमा मास्टर्स साइन्स इन इन्फोर्मेसनटेक्नोलजीमा पढेका हुन् । राजिवले मास्टर्स सकिसके भने गोपाल अध्ययन गरिरहेका छन् । प्रलय न्यु योर्कमा बसेर यो कम्पनी सन्चालन गरिरहेका छन् ।