सिड्नी (हाम्रो खेलकुद) – गल्कोट समाज अस्ट्रेलियाले तोरनल्ह भलिबल रनिङ कप २०२५ को उपाधि जितेको छ । दि गोर्खा स्पोर्ट्स क्लब अस्ट्रेलियालाई ३–० को सोझो सेटमा पराजित गर्दै गल्कोटले उपाधि जित्न सफल भएको हो ।

क्वाटरफाइनल र सेमिफाइनलमा सशक्त प्रदर्शन गरेको गोर्खाले फाइनलमा भने अपेक्षाकृत प्रदर्शन गर्न नसक्दा उप विजेतामा सिमित बन्यो ।

लिडकमस्थित ओबर्न बास्केटबल सेन्टरमा आइतबार भएको फाइनलमा गल्कोटले गोर्खामाथि २५–२०, २५–१७ र २५–२२ को सोझो सेटमा जित निकाल्दै च्याम्पियन बन्न सफल भयो ।

उपाधिसँगै गल्कोटले ३ हजार अष्ट्रेलियन डलरसँगै रनिङ कप र मेडल प्राप्त गरेको छ । दोस्रो भएको गोर्खाले १ हजार ५ सय अष्ट्रेलियन डलरसँगै कप र मेडल प्राप्त गरेको छ ।

गल्कोटका दिल बहादुर सुनार रनिङ कपको सर्वाेत्कृष्ट खेलाडी घोषित भए । उनले १ सय अष्ट्रेलियन डलरसँगै ट्रफी प्राप्त गरे । गोर्खाका बिशाल बहादुर बिक स्पाइकर, गल्कोटका दीपक अधिकारी सेटर, गल्कोटकै अर्जुन अधिकारी क्वीकर, विनाेद खत्री ब्लकर र गल्कोटकै बिशाल कार्की उत्कृष्ट लिवेरो चुनिए । उनीहरुले ट्रफी प्राप्त गरे ।

थकाली सेवा समिति अष्ट्रेलियाले आफ्नो समुदायको महान पर्व तोरनल्ह (फागु पुर्णिमा) को अवसरमा आयोजना गरेको एक दिने रनिङ कपमा अष्ट्रेलियाको सिड्नीमा रहेका नेपाली समुदायका विभिन्न ११ टोलीको सहभागिता रहेको थियो ।

यस रनिङ कपमा नेपाली राष्ट्रिय टोलीका पुर्व कप्तान मान बहादुर श्रेष्ठ, टेकराज अवस्थी, बिशाल बहादुर बिक, हेमन्त बहादुर मल्ल, राजेन्द्र विष्ट, दिल बहादुर सुनार, बसन्त जोशी र लोकेन्द्र राज गिरीले खेलेका थिए ।

रनिङ कप दौरान नै नेपाली महिला भलिबलको चर्चित टिप टप न्यु डायमण्ड युथ स्पोर्ट्स क्लबको आवासीय सुविधासहितको कभर्डहल निर्माण सहयोगार्थ प्रतिभा माली र सरस्वती चौधरीको टोलीबीच च्यारिटी खेल भएको थियो ।

उक्त खेलमा प्रतिभासम्मिलित न्यु डायमण्डले सरस्वती चौधरी सम्मिलित म्याग्दी काली युनाइटेडलाई २–० को सोझो सेटमा पराजित गरेको छ । यस च्यारिटी खेलबाट संकलित रकम न्यु डायमण्डलाई हस्तान्तरण गरिने छ ।