स्याङजा (हाम्रो खेलकुद) – बद्रिलाल नेपालले धन बहादुर प्रधान स्मृति फिडे रेटिङ्ग बुद्धिचाल प्रतियोगिताको उपाधि जितेका छन् । स्वीस लिग ७ चरणको खेलमा बद्रिले ५ जित र दुई बराबरीका साथ ६ अंक बटुल्दै उपाधि जितेका हुन् ।

बद्रिले ट्रफिका साथ १५ हजार रुपैयाँ प्राप्त । त्यस्तै समान ६ अंक भएपनि प्रोग्रेसिव टाइब्रेकमा सिएम भुपेन्द्र निरौला दोश्रा भए । उनले १० हजार प्राप्त गरे । लक्ष्मी स्मृति पुस्तकालयमा संचालित खेलमा चितवनका सुमित पन्त तेश्रा भए । उनले ७ हजार रुपैयाँ पाए । भक्तपुरका भेट्रान गणेशमान दुवाल चौथौं भए, उनले ५ हजार रुपैयाँ प्राप्त गरे । त्यस्तै पूर्व नेपाल च्याम्पियन नविन तण्डुकार पाँचौ, दमकका विक्रम सिंघक छैटौं, धनुषाका शुशील चौधरी सातौं, पोखराका सुनिल बहादुर कोइराला आठौं, सिन्धुलीका राजन पहाडी नवौं र कास्कीका रन्जन कुँवर दशौं भए । पाँचौदेखि दसौं हुनेले ३ हजार रुपैयाँ प्राप्त गरे ।

स्याङजा जिल्ला बुद्धिचाल संघको आयोजनामा चार दिने प्रतियोगितामा ११ जिल्लाका ४० खेलाडी सहभागि थिए । जसमा स्याङजाका विश्व पराजुल उत्कृष्ट पश्चिमान्चल, स्थानीयतर्फ छविलाल नेपाली उत्कृष्ट, कृष्णकुमार राना दोश्रो, अनरेटेडतर्फ स्याङजाकै प्रवेश भुजेल प्रथम भए । त्यस्तै मोहनसिंह प्रधान उत्कृष्ट भेट्रान, निना श्रेष्ठ उत्कृष्ठ महिला, दिपिन परियार उत्कृष्ट जुनियर र १६८७ रेटेड प्युठानका श्रीकृष्ण श्रेष्ठ १७०० मुनी उत्कृष्ट खेलाडी घोषित भए । आयोजक संघका अध्यक्ष शेरजंङ्ग अधिकारी,स्याङ्गजाका प्रहरी उपरीक्ष बेद बहादुर बोगटी, नेपाल बुद्धिचाल संघका उपाध्यक्ष ज्ञानेन्द्र खाइजु, समाजसेवी रत्न श्रेष्ठ लगायतले विजेता खेलाडीलाई पुरस्कृत गरे ।