काठमाडौं (हाम्रो खेलकुद) – प्रधानमन्त्री कप राष्टिय क्रिकेट प्रतियोगितामा नेपाल पुलिस क्लबले जितबाट प्रतियोगिताको सुरूवात गरेको छ । पुलिसले लुम्बिनी प्रदेशलाई ८७ रनले हरायो ।

जितको लागि २ सय ५० रनको लक्ष्य पछाएको लुम्बिनी प्रदेश ५० ओभरमा ९ विकेट गुमाउँदै १ सय ६२ रनमा समेटियो। लुम्बिनीले खराब सुरूवात गर्यो। दुई विकेट गुमाउँदा १६ रन बनाएको थियो। मनिष थापा ४ र आकाश त्रिपाठी बिना कुनै रन सागर ढकालको बलमा आउट भए।

लगतै कप्तान देव खनाल मात्र ११ रनमा ललित राजवंशीको बलमा एलबिडब्लु धरापमा परे। यो सँगै लुम्बिनी थप दबाबमा आयो। ३० रन बनाएका ओपनर मृनाल चौथो विकेटको रूपमा पविलियन फर्किए। यतिखेर लुम्बिनीले ४ विकेटको नोक्सानीमा ६५ रन मात्र बनाएको थियो।

पाँचौ नम्बरमा आएका प्रज्वल थापालाई अन्य खेलाडीले साथ दिन सकेनन्। उनले सर्वाधिक ७२ रन बनाए। सात खेलाडीले दोहोरो अंक छुन सकेनन्।

बलिङमा सागर ढकालको प्रदर्शन सानदार रहयो। १० ओभर बलिङ गर्दै २ मेडन सहित ३२ रन खर्चेर ३ विकेट लिए। ललित राजवंशी र दीपेन्द्र सिंह ऐरीले समान २/२ विकेट झारे।

यसअघि एक्स्ट्रा टेक ओभल स्टेडियममा टस जितेर पहिले ब्याटिङ गरेको नेपाल पुलिस क्लबले ५० ओभरमा ६ विकेट गुमाउँदै २४९ रन बनायो। ओपनर अर्जुन साउद ९ रनमा आउट भए। यसपछि कुशल भुर्तेल र अमित श्रेष्ठले तेस्रो विकेटको लागि ८२ रनको साझेदारी गर्दै इनिङ्स सम्हाल्ने प्रयास गरे। अमित २२ रनमा आउट भए। कुशलले अर्धशतक प्रहार गरे। ७५ बल खेल्दै ६ चौका र १ छक्काको मद्दतमा ५९ रन बनाए।

यसपछि कप्तान दीपेन्द्र सिंह ऐरी मात्र ६ रनमा आउट भए। यतिखेर पुलिसले ४ विकेट गुमाउँदा १ सय २० रन बनाएको थियो। आरिफ शेख र दीलिप नाथले ७८ रनको साझेदारी गरे। दीलिप ३४ रनमा आउट भए। आरिफले ५६ रन बनाए। गुल्सन झा अविजित ३६ रनमा रहे।

बलिङमा अजय चौहानले १० ओभरमा १ मेडन सहित ३८ रन मात्र खर्चेर ३ विकेट लिए। कृष्ण कार्कीले पनि ३ विकेट नै झारे।

पहिलो खेलमा जित सहित पुलिसले २ अंक बनाएको छ। दोस्रो खेल खेलेको लुम्बिनीको यो पहिलो हार हो। हिजो लुम्बीनीले पहिलो खेलमा कोशी प्रदेशलाई हराएको थियो।