काठमाडौं (हाम्रो खेलकुद)- नेपाल पुलिस क्लबले तेस्रो राष्ट्रिय डोरी तान प्रतियोगिताको पुरुष र महिला दुवै समूहको उपाधि जितेको छ ।

पुरुष ६४० केजी र महिला ५८० केजी तौल समूहमा गराइएको प्रतियोगिताको दुवै समूहको शनिवार भएको फाइनलमा पुलिसले त्रिभुवन आर्मी क्लबलसई पराजित गर्यो ।

फाइनलमा पुलिसले आर्मीलाई २-१ को सेटमा हराउँदै पुरुषतर्फको उपाधि जितेको हो । महिला तर्फको फाइनलमा पुलिस आर्मीलाई‌ २-१ सेटमा पराजित गर्दै उपाधि जित्यो ।

पुरुषको पहिलो सेमिफाइनलमा पुलिसले एपिएफलाई र दोस्रो सेमिफाइनलमा आर्मीले मधेशलाई समान २-० को सोझो सेटमा पराजित गरी फाइनलमा भेट पक्का गरेका थिए।

पुरुषतर्फ ७ प्रदेश र ३ विभाग गरि १० टोलीको तथा महिलातर्फ ३ विभाग,कोशी, मधेश, बागमती, गण्डकी र लुम्विनी प्रदेश गरि ८ टोलीको सहभागिता थियो।

लिगमा पुरुष तर्फ २ समूहमा समान ५ टोली थिए। समूह ‘क’ मा पुलिस सबै ४ खेल जित्दै समूह विजेता बनेको थियो । मधेशले ३ खेल जित्दै समूह उपविजेता बनेर सेमिफाइनल पुगेको थियो ।

समूह ‘ ख’ले ३ जित र १ बराबरी खेल्दै आर्मी समूह विजेता, समान २ जित र २ बराबरी गर्दै एपिएफ समूह उप विजेताका रुपमा सेमिफाइनलमा प्रवेश गरेको थियो ।

महिलामा सहभागी ८ टोलीलाई २ समूहमा विभाजन गरिएको थियो। समूह ‘क’ बाट पुलिस पहिलो र लुम्बिनी प्रदेश दोस्रो भएर सेमिफाइनल पुगेका थिए। समूह ‘ख’ बाट आर्मी विजेता र एपिएफ उपविजेताका रुपमा अन्तिम चारमा पुगेका थिए।

पहिलो सेमिफाइनलमा पुलिसले एपिएफलाई र दोस्रो सेमिफाइनलमा आर्मीलेले लुम्बिनीलाई समान २-० को सोझो सेटमा पराजित गर्दै एकअर्कासँगको भेट पक्का गरेका थिए।

पुरुषतर्फको विजेताले १ लाख र दोस्रो टोलीले ५० हजार रुपैयाँ प्राप्त गर्यो । महिला तर्फको विजेता ६० हजार र दोस्रो टोलीले ४० हजार रुपैयाँ प्राप्त गर्यो ।

संघीय सांसद अशोक कुमार चौधरीले विजेता, उपविजेता टोलीलाई पुरस्कृत गरे। आयोजक नेपाल डोरी तान संघका अध्यक्ष भवानी प्रसाद पौडेलले सहभागी टोली, आयोजक सदस्य, टेक्निकल कमिटी र सहयोगी सबैलाई धन्यवाद दिए ।

सरकारको सहयोग पाएमा डोरी तान खेलमार्फत अन्तराष्ट्रिय स्तरमा नेपालको पहिचान बनाउन सकिने डोरी तान संघका महासचिव विमल पौडेलले बताए ।