काठमाडौं (हाम्रो खेलकुद) – तेस्रो संस्करणको माछापुच्छ्रे गाँउपालिका अध्यक्ष कप गण्डकी प्रदेश अन्तरपालिका स्तरीय पुरुष तथा खुल्ला महिला भलिबल प्रतियोगिता यसै सातादेखि हुने भएको छ ।

माछापुच्छ्रे गाँउपालिका खेलकुद बिकास समिति लाहाचोक कास्कीको आयोजनामा हुने प्रतियोगिता १४ देखि १७ फागुनसम्म माछापुच्छ्रे गाँउपालिका वडा नम्वर ७ धम्पुसमा हुनेछ ।

पुरुषतर्फ पालिका बाहिरका जुनसुकै तह र स्तरका दुई खेलाडी तथा महिला भलिबलमा दुई राष्ट्रिय खेलाडी समावेश गराउन पाउने आयोजकले जनाएको छ । प्रतियोगतामा पुरुष र महिला दुवैतर्फ गरी करिव २५ टोलीको सहभागिता रहने अनुमान गरिएको छ ।

पुरुषतर्फको विजेताले दुई लाख रुपैयाँ, ट्रफी, मेडल र प्रमाणपत्र प्राप्त गर्नेछ । दोस्रो हुनेले एक लाख रुपैयाँ, ट्रफी, मेडल र प्रमाणपत्र तथा तेस्रो हुनेले ५० हजार रुपैयाँ, ट्रफी, मेडल र प्रमाणपत्र प्राप्त गर्नेछ ।

खुल्ला महिलातर्फको विजेताले एक लाख रुपैयाँ, ट्रफी, मेडल र प्रमाणपत्र प्राप्त गर्नेछ । दोस्रो हुनेले ५० हजार रुपैयाँ, ट्रफी, मेडल र प्रमाणपत्र तथा तेस्रो हुनेले २५ हजार रुपैयाँसँगै ट्रफी, मेडल र प्रमाणपत्र प्रदान गरिने आयोजकले जनाएको छ ।

विधागततर्फ सर्वाेत्कृष्ट खेलाडी, सर्भर, स्पाइकर, ब्लकर, सेटर, लिवेरो र प्रशिक्षकसँगै उदियमान खेलाडीलाई पनि पुरस्कारको व्यवस्था रहेको छ । साथै प्रतियाेगिता दाैरान स्थानिय र राष्ट्रियस्तरका कलाकारबाट सांस्कृितक प्रस्तुति रहनेछ ।