हेटौंडा (हाम्रो खेलकुद)- हेटौंडा उपमहानगरपालिका वडा नं १५ ले अनुपम घलान स्मृति नगरस्तरीय यू १६ फुटबल प्रतियोगिताको उपाधि जितेको छ ।

शनिबार भएको फाइनलमा वडा नं १८ लाई सडनडेथमा पराजित गर्दै वडा नं १५ ले उपाधि जितेको हो ।

निर्धारित समय र टाइब्रेकरमा समेत बराबरी भएपछि खेलको निर्णय सडन डेथमा भएको हो । सेमिफाइनलमा १५ ले वडा नं ८ लाई र १८ ले वडा नं ९ लाई हराउँदै फाइनल भेट पक्का गरेका थिए।

फाइनलको प्लेयर अफ दि द म्याच बनेका विजेता वडा नं १५ का विकेश थिङ प्रतियोगिताको उत्कृष्ट गोलकिपर घोषित भए ।

वडा नं १८ का अभिराज थापा प्रतियोगिताको सर्वोत्कृष्ट खेलाडी घोषित भए । वडा नं १५ का नविन लो उत्कृष्ट डिफेण्डर, १८ का साजन लोप्चन उत्कृष्ट मिडफिल्डर, १५ का रेहान घलान उत्कृष्ट फरवार्ड र हेटौंडा १५ का उज्वल वाइबा उत्कृष्ट प्रशिक्षक घोषित भए ।

सर्वोत्कृष्टले १० हजार र विधागत उत्कृष्ट खेलाडीले समान ५ हजार रुपैयाँसहित ट्रफी प्राप्त गरे । विजेता टोलीले १ लाख र दोस्रो टोलीले ७० हजार रुपैयाँ प्राप्त गर्यो ।

नगर खेलकुद विकास समिति हेटौंडाको आयोजना तथा हेटौंडा उपमहानगरपालिकाको प्रायोजनमा पिप्ले क्याम्पा रंगशालामा भएको प्रतियोगितामा हेटौंडाका १९ मध्ये १० वटा वडाको सहभागिता थियो ।

हेटौंडा–१२ निवासी अनुपम घलानको गत असोजमा एन्फा एकेडेमी सिस्नेरीको पहिरोमा परेर निधन भएको थियो । उनकै स्मृतिमा हेटौंडामा प्रत्येक वर्ष आयोजना गर्ने गरी यस वर्षबाट प्रतियोगिता सुरु भएको हो ।

नगर खेलकुद विकास समितिका अध्यक्ष रविन्द्र घिमिरेको अध्यक्षतामा भएको प्रतियोगिताको समापनमा हेटौंडा उपमहानगरपालिकाका कार्यवाहक मेयर राजेश बानियाँ मुख्य अतिथी थिए। ।