काठमाडौं (हाम्रो खेलकुद) – च्याम्पियन मार्शल आर्ट्स एकेडेमी युएसएले अमेरिकाको न्यु जर्सीमा भएको गार्डेन स्टेट कराते च्याम्पियनसिप २०२५ मा चार पदक जित्न सफल भएका छन् ।

गार्डेन स्टेट कराते च्याम्पियनसिप २०२५ मा प्रभावशाली प्रदर्शन गर्दै दुई रजत पदक र दुई कास्यपदक जित्न सफल भएको करातेका पुर्व अन्तर्राष्ट्रिय खेलाडी तथा एकेडेमीका प्रशिक्षक सुनिल लामाले जानकारी गराए ।

सुनिलका छोरा याङतेन लामाले १०–११ वर्षको भिडन्तमा कुमितेमा रजत र कातामा कांस्य पदक जित्न सफल भए । ५ वर्ष मुनिको युवा डिभिजनमा रेइदेन थापा मगरले कुमितेमा रजत हात पार्दा ६–७ वर्ष उमेर समूहमा अभिर महर्जनले कुमितेतर्फ कास्य पदक जित्न सफल भएको प्रशिक्षक लामाले जानकारी गराए ।

११औं साग (दक्षिण एसियाली खेलकुद) र १३औं एसिया प्यासेफिक सितोरियो कराते च्याम्पियनसिपका स्वर्ण विजेता लामाले आफ्नो प्रशिक्षणमा रहेका खेलाडीले उच्च प्रदर्शन गर्दै हात पारेको सफलतामा गर्व गर्दै यो नतिजाले आफ्नो प्रशिक्षणमा लगाएको समर्पण र कडा परिश्रमलाई प्रतिबिम्बित गरेको बताए ।

न्यूयोर्कको वुडसाइडमा अवस्थित च्याम्पियन मार्शल आर्ट्स एकेडेमी युएसएले कराते कलामार्फत अनुशासन, सम्मान र दृढतालाई प्रवर्दन गर्दै सबै उमेरका खेलाडीहरूलाई प्रशिक्षण दिइरहेको छ । च्याम्पियन मार्शल आर्ट्स एकेडेमीकाे नेपालमा मुख्य कार्यालय रहेकाे छ ।