काठमाडौं(हाम्रो खेलकुद) – जय नेपाल कप टि ट्वान्टी क्रिकेट प्रतियोगितामा आजको खेलमा ढाका विश्वविद्यालय र लखनउ विश्वविद्यालय विजयी भएका छन् ।

शुक्रवारको पहिलो खेलमा बंगलादेशको ढाकाले नेपालको पुर्वाञ्चल विश्व विद्यालयलाई १ सय ५२ रनको फराकिलो अन्तरले पराजित गरेको छ । ढाकाले दिएको २ सय ३६ रनको लक्ष्य पछ्याएको पुर्वाञ्चल १९.३ ओभरमा ८३ रनमा समेटियो ।

पुर्वाञ्चलका लागि धिरज यादवले नट आउट रहदै सर्वाधिक १७ रन जोडे । ओम चौधरीले १५ तथा रविन्द्र साहले १० रन जोडे । ढाकाका लागि शरियर सकिबले ४, इफ्तिकार हुसेनले २ तथा मुजिबुर रहमान, महुद्धिन तारिक, असरफुल इस्लाम र महफुजुल इस्लामले समान १ विकेट लिए ।

त्यसअघि पहिले ब्याटिङ गरेको ढाकाले निर्धारित २० ओभरमा ४ विकेट गुमाएर २ सय ३५ रनको योगफल तयार गरेको थियो । ढाकाका लागि मोहम्मद रहमानले सर्वाधिक ९६ रन जोडे । उनले ३७ बलमा ३ चौका र १० छक्का प्रहार गरे ।

सिफत खानले २३ बलमा ५०, इफ्तिकार हुसेनले २३ बलमा ३८ तथा महफजुल इस्लामले २५ बलमा ३१ रन जोडे । पुर्वाञ्चलका लागि नितिश यादव, धिरज यादव, अमित मण्डल र अभिषेक मण्डलले समान १ विकेट लिए ।

आजै भएको दोस्रो खेलमा नेपालको काठमाडौं विश्वविद्यालय भारतको लखनउ विश्वविद्यालयसँग ७३ रनले पराजित भयो । नेपाल विद्यार्धी संघले आयोजना गरेको प्रतियोगितामा नेपालका ४, भारतका ३ तथा बंगलादेशको १ विश्वविद्यालयको सहभागिता छ ।

प्रतियोगिताको खेलतालिका