काठमाडौं(हाम्रो खेलकुद) – कैलालीमा जारी प्रधानमन्त्री कप महिला राष्ट्रिय क्रिकेट प्रतियोगितामा बागमती प्रदेशले त्रिभुवन आर्मी क्लबलाई पराजित गरेको छ ।

सोमवार सम्पन्न दिनको पहिलो खेलमा समूह बी मा रहेको बागमतीले विभागीय टोली आर्मीलाई १४ रनले पराजित गरेको हो । हुस्सुका कारण ढिला सुरु भएको खेल १५ ओभरमा छोट्याइएको थियो ।

बागमतीले दिएको ८२ रनको लक्ष्य पछ्याएको आर्मी १३.२ ओभरमा ६७ रन जोड्दै अल आउट भयो । आर्मीका लागि अञ्जली विश्वकर्माले सर्वाधिक १४ रन जोडिन् । निग्मा तामाङले १३ तथा कप्तान लक्ष्मी साउदले १० रन बनाउँनु बाहेक अन्य ब्याटरले दोहोरो अंकमा रन बनाउन सकेनन् ।

बागमतीका लागि सोनु खड्का, कन्चन श्रेष्ठ र मनिषा उपाध्यायले समान २ तथा संस्कृती फुयाल र विपाशा शाहीले समान १ विकेट लिइन् ।

त्यसअघि धनगढीको फाप्ला क्रिकेट मैदानमा टस हारेर पहिले ब्याटिङको निम्तो पाएको बागमतीले निर्धारित १५ ओभरमा २ विकेट गुमाएर ८१ रन जोडेको थियो । बागमतीका लागि ओपनर यशु पाण्डेले सर्वाधिक २५ रन जोडेकी थिइन् । कप्तान कन्चन श्रेष्ठले नट आउट २४ रन बनाउँदा यशोदा विष्ट २० रनमा नट आउट रहिन् ।

आर्मीका लागि इश्वरी विष्ट र लक्ष्मि साउदले समान १ विकेट लिए । जितसँगै बागमती २ खेलमा २ अंक जोड्दै समूह बी को तेस्रो स्थानमा छ । पराजित आर्मी २ खेलमा २ अंकका साथ शीर्ष स्थानमा छ । समूह ‘ए’ बाट एपिएफ र सुदूरपश्चिम प्रदेश सुपर फोरमा पुगिसकेका छन् ।