काठमाडौं(हाम्रो खेलकुद) – तारकेश्वर युवा क्लबको आयोजनामा जारी स्युचाटार क्रिकेट लिग इन्डोर टि-टेन प्रतियोगिताको तेस्रो दिन सोमवार पनि ७ वटा खेल भएका छन् ।

आज थानकोट वारियर्स, स्मार्ट ए केयर मिडिया, ग्रेट हिमालयन क्रिकेट एकेडेमी, नेक्सस क्रिकेट एकेडेमी र मिक्समान्डु विजयी भएका छन्।

पहिलो खेलमा समुह डी अन्तर्गत थानकोट वारियर्सले सानो स्वर्ग नेपाललाई ३ विकेटले पराजित गर्यो ।

६४ रनको लक्ष्य पाएको थानकोट वारियर्सले ८.३ ओभरमा ७ विकेट गुमाएर लक्ष्य पूरा गर्यो । प्लेयर अफ द म्याच घोषित थानकोट वारियर्सका सुरेश पुनले नट आउट २९ रन बनाए ।

दोस्रो खेलमा समुह बि अन्तर्गत स्टुडियो सेभेनले स्मार्ट ए केयर मिडियालाई ६ विकेटले पराजित गर्यो । ४६ रनको लक्ष्य पछाएको स्टुडियो सेभेनले ६.१ ओरमा एक विकेट गुमाएर लक्ष्य पूरा गर्यो ।

प्लेयर अफ द म्याच घोषित स्टुडियो सेवनका सन्देश कार्कीले १० रन बनाउनुको साथै ३ विकेट पनि लिए।

यो जितसँगै समूह बि को उपविजेता बन्दै क्वाटरफाइनलमा प्रवेश गर्यो । समुह बि बाट किंग्स क्रिकेट सबै ४ खेलमा जित समुह विजेता बनेको थियो । उपविजेता बनेको स्टुडियो सेभेनले ४ खेलमा ३ जित हात पार्यो ।

तेस्रो खेलमा समुह डी अन्तर्गत ग्रेट हिमालय क्रिकेट एकेडेमीले लगातार चौंथो जित दर्ता गर्नेक्रममा पञ्चायन युथ क्लबलाई १२ रनले पराजित गर्यो ।

४३ रनको लक्ष्य पछ्याउने क्रममा पञ्चायन ३० रनमा अल आउट भयो । प्लेयर अफ द म्याच घोषित ग्रेट हिमालयका सन्दीप पराजुलीले ४ विकेट लिए । जितसंगै समुह डी को विजेताको रुपमा ग्रेट हिमालय क्रिकेट एकेडेमी क्वार्टरफाइनल प्रवेश गरेको छ ।

चौथो खेलमा समुह बि अन्तर्गत नेक्सस क्रिकेट एकेडेमीले स्मार्ट ए केयर मिडियालाई सात विकेटले पराजित गर्यो ।

२६ रनको लक्ष्य पाएको नेक्ससले २.२ ओभरमा कुनै विकेट नगुमाई लक्ष्य पूरा गर्यो । प्लेयर अफ द म्याच घोषित नेक्ससका राजेश रावतले चार विकेट लिए ।

पाँचौं खेलमा समुह डी अन्तर्गत मिक्समाण्डुले पञ्चायन युथ क्लबलाई ३० रनले पराजित गर्यो ।

८८ रनको लक्ष्य पछ्याउने क्रममा पञ्चायन ५७ रनमै समेटिन पुग्यो । प्लेयर अफ द म्याच घोषित मिक्समाण्डुका सोनु देवकोटाले तीन विकेट लिए ।

छैटौं खेलमा समुह बि अन्तर्गत नेक्सस क्रिकेट एकेडेमीले टिम रेन्सुलाई पाँच विकेटले पराजित गर्यो । टिम रेन्सुले दिएको ५३ रनको लक्ष्य नेक्ससले ७.२ ओभरमा दुई विकेट गुमाएर पूरा गर्यो । प्लेयर अफ द म्याच घोषित नेक्ससका आर्यन विकले ३ विकेट लिए ।

सातौं खेलमा समुह डी अन्तर्गत मिक्समाण्डुले सानो स्वर्ग नेपाललाई ७९ रनले पराजित गर्यो ।

१ सय ५ रनको लक्ष्य पछ्याएको सानो स्वर्ग २५ रनमा अल आउट भयो । प्लेयर अफ द म्याच घोषित मिक्समान्डुका अनुप श्रेष्ठले ४० रन बनाए ।

चौंथो दिनको खेलपछि समुह बि बाट किंग्स क्रिकेट र स्टुडियो सेभेन, समुह सी बाट टिम बिडीएस तथा समुह डी ग्रेट हिमालय क्रिकेट एकेडेमी क्वार्टरफाइनलमा पुगेका छन् ।

लिग कम नकआउट आधारमा जारी प्रतियोगिताको विजेताले १ लाख र दोस्रो हुने टोलीले ५० हजार रुपैयाँ प्राप्त गर्ने छन् ।

प्लेयर अफ सिरिजलाई १० हजार, उत्कृष्ट बलर र ब्याटरले समान ५ हजार रुपैयाँबाट पुरस्कृत हुनेछन् ।