काठमाडौं (हाम्रो खेलकुद) – त्रिभुवन आर्मी क्लब हरिकुमार रिमाल र नेपाल एपिएफ क्लबकी कान्छीमाया कोजु कान्तिपुर हिरो हाफ म्याराथनको उपाधि जितेका छन् । शनिबार भएको सातौं संस्करणमा च्याम्पियन बन्ने क्रममा हरि र कान्छिमायाले कोर्स रेकर्ड राखेका छन् ।

कान्तिपुर पब्लिकेसन्सको २५ औं वार्षिकोत्सवका अवसरमा भएको हाफ म्याराथनमा पुरुषतर्फ हरिले १ घन्टा ६ मिनेट ४१ सेकेन्ड समय खर्चेका थिए । महिलातर्फ कान्छीमायाले १ घन्टा १९ मिनेट २२ सेकेन्डको समय निकालिन् । गत वर्ष एपीएफका गोपिचन्द्र पार्कीले १ घन्टा ८ मिनेट र २९ सेकेन्डको तथा रेसु बस्नेतले १ घन्टा २८ मिनेट २० सेकेन्डको कोर्स रेकर्ड बनाएका थिए । विजेता दुवै हरि र कान्छिमायाले हिरो ड्यास स्कुटर र समान ५० हजार रुपैयाँ प्राप्त गरे ।

पुरुषमा भारतीय आर्मीका अनिष थापा मगर र तिर्थकुमार पुन दोस्रो र तेस्रो भए । अनिषले १ घन्टा ६ मिनेट ४३ सेकेन्ड र तिर्थले १ घन्टा ७ मिनेट १९ सेकेन्डको समय निकाले । गत वर्षको विजेता एपपएफका गोपिचन्द्र १ घन्टा ८ मिनेट ४ सेकेन्ड, शंकरमान थापा १ घन्टा ८ मिनेट ११ सेकेन्डका साथ पाँचौं, र राम्जी बस्नेत १ घन्टा ९ मिनेट ३९ सेकेन्डका साथ छैटौं भए ।

महिलातर्फ आर्मीकी विश्वरुपा बुढा दोस्रो र सानु कार्की तेस्रो भए । विश्वरुपाले १ घन्टा १९ मिनेट २६ सेकेन्ड र सानुले १ घन्टा २२ मिनेट ५७ सेकेन्डको समय निकाले । एपिएफकी पुष्पा भण्डारी १ घन्टा २४ मिनेट ५७ सेकेन्ड समयका साथ चौथो, आर्मीकी रेसु बस्नेत १ घन्टा २६ मिनेट २६ सेकेन्डका साथ पाँचौं र एपीएफकी विन्द्रा धनके श्रेष्ठ १ घन्टा २७ मिनेट ८ सेकेन्डसहित छैटौं भइन् ।

महिला र पुरुष दुवै विधामा दोस्रो देखि छैटौं हुनेलाई क्रमशः ३०, २०, १०, ५ र ३ हजार रुपैयाँ प्राप्त गरे । दोस्रो हुनेलाई लेगो मोबाइल सेट तथा तेस्रो देखि छैटौं हुनेलाई शिखर सुजको गिफ्ट ह्याम्पर प्रदान गरिएको थियो ।
५ किलोमिटरको कर्पोरेट दौडमा क्लासरुमका भुपेन्द्र बटाला १८ मिनेट १२.०८ सेकेन्डका साथ विजयी भए । थिएटर मलका उत्तम श्रेष्ठ १८ मिनेट १८ सेकेन्डसहित दोस्रो र युथ जर्नलिजम इन्टरनेश्नलका सन्तोष पौडेल १९ मिनेट ४६.०९ सेकेन्डका साथ तेस्रा भए ।

कर्पोरेटको महिलातर्फ थिएटर मलका सन्तोषी श्रेष्ठ १९ मिनेट १५.०७ सेकेन्ड समयका साथ विजयी भइन् । ओयस्टर स्पा एन्ड फिटनेस सेन्टरकी निर्मला महर्जन २४ मिनेट ५२.०८ सेकेन्ड समय निकाले दोस्रो र सिभिल बैंककी लाडेन प्रधान २५ मिनेट २२.१६ सेकेन्डका साथ तेस्रो भइन् ।

दुबै समूहको विजेतालाई क्याथे ड्रागनको हङकङको रिटर्न टिकट र दुई रात बसोबासको उपहार प्रदान गरिएको थियो । दोस्रोलाई पोखराको रिटर्न टिकट र तेस्रो हुनेलाई माउन्टेन फ्लाइट टिकट प्रदान गरिएको थियो ।
ह्विलचेयरमा पुरुषतर्फ रामबहादुर गुरुङ १२ मिनेट ९.७७ सेकेन्ड समयका साथ पहिलो भए । प्रेम विक १४ मिनेट ०४.२४ सेकेन्डसहित दोस्रो र भरत विसी २५ मिनेट २२.१८ सेकेन्डका साथ तेस्रा भए ।

महिलातर्फ लालि तामाङ १६ मिनेट ३८.७९ सेकेन्डका साथ पहिलो भइन् । यामी झाक्री मगर १७ मिनेट ०२ सेकेन्डसहित तेस्रो र रज्नी राई १७ मिनेट १७.४२ सेकेन्डका साथ तेस्रो भइन् । दुवै विधाका विजेताले २० हजार, दोस्रो हुने १० हजार र तेस्रो हुनेले ५ हजार रुपैयाँ प्राप्त गरे ।