काठमाडौं (हाम्रो खेलकुद) – नेपाली क्रिकेट टोलीका पूर्व ओपनर तथा विकेटकिपर सुवास खकुरेलले सन्न्यासको घोषणा गरेका छन् । सामाजिक सञ्जालमार्फत उनले यस्तो घोषणा गरेका हुन् ।

सन् २०११ डिसेम्बरमा हङकङविरुद्ध डेब्यू गरेका उनले २०२२ जुनमा ओमानविरुद्ध अन्तिम खेल खेलेका थिए । पछिल्लो समय अष्ट्रेलियामा रहँदै आएका उनले सन्न्यास लिएको जनाएका हुन् ।

‘मेरो परिवार, सहकर्मी, प्रशिक्षक र समर्थकलाई धन्यावाद दिन चाहन्छु । मैदानबाट टाढा भएपनि क्रिकेट मेरो मुटुमा रही रहनेछ’, उनले लेखेका छन् । एक दशक नेपाली टोलीबाट खेल्नु अविश्वसनीय यात्रा रहेको समेत लेखेका छन् ।

उनले नेपालबाट ६ ओडीआईमा १ अर्धशतकसहित ९७ रन बनाएका छन् । २०१८ अगष्ट ३ मा नेदरल्यान्ड्ससँग ओडीआईमा डेब्यू गर्दा त्यसै वर्ष युएईविरुद्ध कलालाम्पुरमा अर्धशतक हानेका थिए ।

टि २० आईमा २०१४ मा हङकङविरुद्ध डेब्यू गरेका थिए । उनले ८ टि ट्वान्टी आईमा १ सय १२ रन बनाएका थिए । नेपालबाट उनले १४ लिष्ट ए र १९ टि ट्वान्टी खेल खेलेका थिए ।

२०१२ मा आसिसी डिभिजन ४ मा अमेरिकाविरुद्ध १ सय १५ रनको शतकीय इनिङ खेलेका थिए । २०१४ को टि ट्वान्टी विश्वकपमा अफगानिस्तानविरुद्ध ५३ बलमा ६ चौका र १ छक्कासहित ५६ रन बनाएका थिए ।

नेपालले २०१४ र २०२४ मा गरि दुई पटक टि ट्वान्टी विश्वकप खेलेको छ । विश्वकपमा अर्धशतक प्रहार गर्ने सुवास एक्लो नेपाली खेलाडी हुन् । विश्वकपपछि भने उनी नियमित नेपाली टोलीमा रहन सकेनन् । हातको चोट र कमजोर लयले टोलीमा आउने जाने भएको थियो ।

नेपालले पहिलो रोजाईका ओपनर आसिफ शेख र कुशल भुर्तेल दुबै घाइते भएपछि २०२२ मा लिग २ मा अमेरिकामा उनलाई नेपाली टोलीमा राखिएको थियो । ओमानसँग ३ रनमा आउट भएपछि भने उनी फेरि मौका पाउन सकेनन् । उनले घरेलु क्रिकेट भने नेपाल एपिएफ क्लब र बागमती प्रदेशबाट खेले ।

उनले २०१७ देखि २०२२ सम्म पिएम कपमा १८ खेलमा १ शतकसहित कुल ४ सय ९२ रन बनाएका थिए ।

२०१८ मा मधेशविरुद्ध उनले प्रदीप ऐरीसँग मिलेर दोस्रो विकेटलाई २ सय ३१ रनको साझेदारी गरेका थिए । प्रदीपले १ सय ५८ र सुवासले १ सय ३ रन जोडेका थिए । उक्त साझेदारी हालसम्म पिएम कपको कुनैपनि विकेटको सर्वाधिक मानिन्छ । समग्रमा सुवास नेपालका एक सफल विकेटकिपर ब्याटरमा पर्दछन् ।