काठमाडौं (हाम्रो खेलकुद) – गण्डकी प्रदेश भलिबल संघले यसै साता काठमाडौंमा सुरु हुने काभा पुरुष क्लब भलिबल च्याम्पियनसिप २०२४ को लागि अन्तिम टोली घोषणा गरेको छ ।

गण्डकीले खोम प्रसाद पाण्डे ‘हरि’ को कप्तानीमा ३ भारतीय खेलाडीलाई समेट्दै १४ सदस्यीय टोली घोषणा गरेको हो । यस्तै गण्डकीले विभागीय त्रिभुवन आर्मी क्लबका दुई खेलाडी सेटर दुर्गा प्रसाद महतो र मिडल ब्लकर हरि बहादुर अधिकारीलाई पनि टोलीमा समेटेको छ । दुर्गा गण्डकीकै पूर्व खेलाडी हुन् ।

भारतीय खेलाडीमा आठौं प्रधानमन्त्री कप एनभिए लिगमा सुदुर पश्चिममा खेलेका साहिल कुमार, भारतीय राष्ट्रिय टोलीबाट खेलिसकेका प्रिन्स र हिमांशु त्यागी रहेका छन् । साहिलले भारतमा भएको प्रो भलिबल लिगमा पनि सानदार प्रदर्शन गरेका थिए ।

यसै च्याम्पियनसिपका लागि गण्डकीका भरपर्दा स्पाइकर रवि केसी जापानबाट नेपाल आइसकेका छन् । विवश आले, हिमाल सुनारी, इन्द्र बहादुर विक, राजन थापा, सरोज वर्देवा र कुन्जन शाही ठकुरी गण्डकीको टोलीमा निरन्तरता छन् । टोली रमेश केसीलाई पनि मुख्य प्रशिक्षकमा निरन्तरता दिएको छ ।

यसअघि लिवेराेकाे भुमिकामा रहेका राजन यसपटक सेटरकाे भुमिकामा काेर्टमा उत्रनेछन् ।

काभाको कार्यक्रम अनुसार नेपाल भलिबल संघको आयोजनामा हुने काभा पुरुष अन्तर्राष्ट्रिय क्लब भलिबल च्याम्पियनसिप २२ देखि २९ मंसिरसम्म त्रिपुरेश्वरस्थित राष्ट्रिय खेलकुद परिषद् (राखेप) को कभर्डहलमा हुनेछ ।

आठौं प्रधानमन्त्री कप एनभिए लिग च्याम्पियन बनेको हेल्प नेपाल र उपविजेता गण्डकी प्रदेशले पहिलो पटक आयोजना हुन लागेको काभा पुरुष क्लब च्याम्पियनसिपमा नेपालको प्रतिनिधित्व गर्दैछन् ।

काभा क्लब च्याम्पियनसिपमा नेपालका २, भारत, माल्दिभ्स र इरानको समान १ गरि ५ क्लबले प्रतिस्पर्धा गर्नेछन् ।

हेल्प नेपाल, गण्डकी, भारतको क्यालिकट, माल्दिभ्सको एचडिसी क्लब र इरानको चादौरा मालोे क्लबले च्याम्पियनसिपमा भाग लिनेछन् ।

च्याम्पियन्सिपमा सिंगल राउन्ड रोविन लिग, सेमिफाइनल, तेस्रो स्थान र फाइनल गरि १४ खेल हुनेछ । च्याम्पियन्सिपको हाम्रो खेलकुद र कान्तिपुर म्याक्स एचडीबाट प्रत्यक्ष प्रसारण हुनेछ ।

यस्तै आठौं प्रधानमन्त्री कप एनभिए लिग च्याम्पियन टिपटप हेल्प नेपाल स्पोर्ट्स क्लबले पनि ३ पाकिस्तानी खेलाडीलाई समेटेर १४ सदस्यीय टोली घोषणा गरेको छ । तीन पाकिस्तानी खेलाडीमा स्पाइकर मजर अली र मुवासर राजा किङ तथा सेटर अदनान खान रहेका छन् । उनीहरु सोमबार नेपाल आइपुगेका छन् ।

यसपाली हेल्प नेपालबाट रविन चन्द ठकुरी, सफल विक, भीम बहादुर गाहा, धन बहादुर भट्ट क्षेत्री र दुर्गा बहादुर खड्काले खेल्नेछन् ।
कप्तान टोप बहादुर थापा ‘दीपक’, उप कप्तान सन्जु विक्रम शाह, सुरेन्द्र बम ठकुरी, सुवास कुँवर, चिरन खड्का र मनिष मानन्धर टोलीमा छन् ।
मुख्य प्रशिक्षकमा गत साता मात्रै एफआईभिबी कोचेज कोर्स लेभल ३ पूरा गरेका उत्सव खड्कालाई निरन्तरता दिएको छ । यसअघि टोलीका महत्वपुर्ण सदस्य रहेका अमृत केसीलाई सहायक प्रशिक्षकमा नियुक्त गरेको छ ।

गण्डकीको टोली
आउट साइड हिटर – खोम प्रसाद पाण्डे ‘हरि’ (कप्तान), रवि केसी, सरोज वर्देवा, साहिल कुमार र हिमांशु त्यागी
सेटर – विवश आले, दुर्गा प्रसाद महतो र राजन थापा
मिडल ब्लकर – हिमाल सुनारी, हरि बहादुर अधिकारी, इन्द्र बहादुर विक र प्रिन्स
लिवेरो – कुन्जन शाही ठकुरी र ईश्वर थापा
मुख्य प्रशिक्षक – रमेश केसी
सहायक – शंकर गुरुङ र उत्तम थापा
टिम व्यवस्थापक – टुक बहादुर गुरुङ
फिजियो – डाक्टर अनुप