काठमाडौं (हाम्रो खेलकुद)- फाल्डो जुनियर टुर युरोप ग्रान्ड फाइनल २८औं संस्करणको यु-२१ तर्फको उपाधि विजेता नेपालका नम्बर एक एमेच्योर गल्फर सदभाव आचार्य स्वदेश फर्किएका छन्।

सदभावलाई त्रिभुवन अन्तर्राष्टिय विमानस्थलमा आज राष्ट्रिय खेलकुद परिषदका सदस्य सचिव टंकलाल घिसिङ, नेपाल गल्फ संघका अध्यक्ष टासी घले तथा संघका पदाधिकारीहरुले स्वागत गरे।

नेपाली खेलाडीले फाल्डो सिरिज अन्तर्गत ग्रान्ड फाइनलमा उपाधि जितेको यो पहिलो पटक हो। सदभाव ओभरअलतर्फ दोस्रो भएका थिए। युएईको आबुधाबीस्थित अल आइन इक्वेसटेरियन, सुटिङ एण्ड गल्फ क्लबमा भएको प्रतियोगितामा समग्रमा ५-अन्डर २०५ स्कोर गर्दै सदभावले उपाधि जितेका हुन्।

उनले डेनमार्कका भिक्टोर कोफोड उसलेनलाई २ स्ट्रोकले हराउँदै पहिलो पटक नेपाललाई उपाधि जित्दै इतिहास बनाए। सन २०१२ देखि नेपाल गल्फ संघले फाल्डो जुनियर टुर नेपाल च्याम्पियनसिप आयोजना गर्न सुरू गरेको हो। १२ वर्षमा पहिलो पटक नेपालले ग्रान्ड फाइनलमा उपाधि जितेको हो।

‘नेपालको प्रतिनिधित्व गर्नु र उपाधि जित्नु गर्वको विषय हो। सपना पूरा भएको छ। यो सुरूवात मात्र हो र अझै कडा मिहिनेत गरेर यो भन्दा राम्रो नतिजा निकाल्न प्रयास गर्नेछु,’ सदभावले भने ।

उनले करिब एक वर्ष भारतको तरूण सरदेशाई एकेडेमीमा र पछिल्लो समय अमेरिकामा दुई महिना प्रशिक्षण गरेका थिए। उनले यसअघि बङ्गलादेश ओपनमा सुबाशसँग मिलेर टिम स्पर्धामा स्वर्ण पदक जितेका थिए। व्यक्तिगततर्फ सदभावको यो पहिलो अन्तराष्ट्रिय उपाधि हो।

सदभावसँगै जयवीर आचार्य र आईसटिना टण्डनले पनि सहभागिता जनाएका थिए। उनीहरूले भने उपाधि जित्न सकेनन्। गत अप्रिलमा नेपालमा भएको फाल्डो जुनियर टुर नेपाल च्याम्पियनसिपमा आ-आफ्नो क्याटगरीमा पहिलो हुँदै उनीहरू ग्रान्ड फाइनलमा छनोट भएका थिए।

६ पटकका मेजर टाइटल विजेता सर निक फाल्डोले यो प्रतियोगिता आयोजना गरेका हुन्। यो प्रतिष्ठित जुनियर प्रतियोगिता आयोजनाका लागि आर एण्ड ए, डिपी वल्ड टुर र लेडिज युरोपियन टुरले सहयोग गरेको छ। युएईमा युरोप, मिडल इस्ट, र एसियाबाट ७० जुनियर गल्फरले उपाधिका लागि प्रतिस्पर्धा गरेका थिए।

यो प्रतियोगिताबाट एमेच्योर गल्फ वरियतामा अंक जोडिने छ। साथै २०२५ को एसिया ग्रान्ड फाइनल, जुनियर दुबाई डेसर्ट क्लासिक र अनिका इनभिटेसनल युरोपको छनोट प्रतियोगिता पनि हो।